Փաստ ինֆո

Ներքին գործերի նախարարություն ստեղծելով ոստիկանության աշխատանքի որակը ոչ միայն չի լավանա, այլև շատ ավելի վատը կդառնա։ Նախարարության մեջ ներառվող 3 կառույցների` ՀՀ ոստիկանության, ԱԻՆ-ի և միգրացիոն ծառայության, այսպես կոչված օպտիմալացման քողի տակ, ճիշտ հակառակը տեղի կունենա, աշխատակիցների քանակը, դրանից բխող նաև բյուրոկրատական խառնաշփոթն ու քաշքշուկը, ոչ թե կնվազեն, այլ կավելանան։ «Փաստինֆո»-ի հետ զրույցում նման կարծիք հայտնեց ՀՀ ոստիկանության պետի նախկին տեղակալ, ոստիկանության գեներալ-մայոր Գագիկ Համբարձումյանը։

«Նոր ստեղծվող նախարարության վերնախավ –ապարատը համալրվելու է ՔՊ-ական սրիկաներով։ Մինչդեռ այս փոփոխությամբ փորձում են առաջինը ցույց տալ, թե ինչ-որ բարեփոխում, ինչ-որ բան են անում, իբր հանրային վերահսկողությունն են ուժեղացնում, որոշ ժամանակ առաջ էլ ասում էին` պառլամենտական վերահսկողությունն են ուժեղացնում, դրանք բոլորը փուչիկ, ձևական, աչքին թոզ փչելու գաղափարներ են»,- ասաց նա։

Գեներալ-մայորը կոչ է անում հեռուն չգնալ, դիտարկել, վերլուծել, թե ինչ է կատարվում մեր երկրում` թմրանյութերի տարածման, առանձնապես ծանր հանցագործությունների, առանձնակի դաժան սպանությունների ավելացման առումով։ Իսկ ի՞նչ են անում ոստիկանությունում . մատը մատին չեն խփում. դրանց շատ քիչ մասն է բացահայտվում, որոշներն անգամ դատարան չեն հասնում, փոխարենը համակարգի աշխատակիցների աշխատավարձերն են բարձրացել, պարգևավճարներն ավելացել։

«Ինչպես հիմա, նախարարության կազմում ևս ոստիկանության հիմնական գործառույթը` հանցավորության դեմ պայքարի աշխատանքը, զրո է լինելու, դա ոչ մեկին չի հետաքրքրում. մի կետից ուղղորդվող կառույցի հիմնական նպատակը լինելու է իրենց ապօրինի իշխանության համար ապօրինի հենարան ապահովելը։ Թմրանյութերը խեղդում են բացահայտ, գողությունները, սպանությունները, ո՞ւմ է դա հետաքրքրում։ Իսկ պարգևավճարներն ու աշխատավարձերը մի կողմից բյուջեի թալան են, մյուս կողմից` իրենց հենարանն ապահովող կաշառք»,- նշեց ոստիկանության գեներալ-մայորը։
Իսկ այս պարագայում, թե ով կղեկավարի նորաստեղծ կառույցը, ըստ Համբարձումյանի, բոլորովին էլ կարևոր չէ։

«Ոչ մի նշանակություն չունի, թե այդ պոլի փայտը պլասմասսայից է, փայտից է, մետաղից է` նույն ֆունկցիան է կատարելու, ինչ տարբերություն»,- եզրափակեց գեներալ-մայորը։

Հիշեցնենք, որ ՀՀ վարչապետ Նիկոլ Փաշինյանը երեկ` հունվարի 5-ին, կառավարության նիստում հայտարարեց, որ նորաստեղծ ներքին գործերի նախարարության ղեկավարությունը` նախարարն ու փոխնախարարները, կնշանակվեն հաջորդ շաբաթ։ Նա նշեց, որ նախարարությունը դե յուրե արդեն ստեղծվել է, և այժմ ընթանում են դե ֆակտո կազմավորման գործընթացները։

Ավելի վաղ ԱԺ-ն ընդունել է ՆԳՆ ստեղծելու օրենքի նախագիծը, իսկ կառավարության այս տարվա առաջին նիստում Նիկոլ Փաշինյանը հայտարարեց, որ նախարարի ու փոխնախարարների նշանակումները կլինեն արդեն հաջորդ շաբաթ:

Աղբյուր` Փաստինֆո