Փաստ ինֆո

Արցախի Մարտունու շրջանի Հացի գյուղի վարչական տարածքում գյուղատնտեսական աշխատանք կատարող բնակիչների ուղղությամբ այսօր կրակ են բացել 1-1,5 կմ հեռավորության վրա գտնվող, Արցախի օկուպացված տարածքներում տեղակայված ադրբեջանական դիրքից։ Այդ մասին «Փաստինֆո»-ին հայտնել է Հացիի գյուղապետ Սանթուր Սարգսյանը։

«Գյուղին պատկանող վարելահող էր՝ ցորենի դաշտ, որտեղ մի քանի հոգի աշխատում էին։ Երբ ադրբեջանական դիրքից կրակահերթ են բացել, մարդիկ ստիպված ընդհատել են աշխատանքը ու հեռացել տարածքից»,-ասաց գյուղապետը։

Այսօր Արցախի ՆԳՆ ոստիկանությունը հայտնել էր, որ Հացի գյուղի բնակիչ Ի. Աբրահամյանը ոստիկանություն է դիմել, որ ժամը 13:00-ի սահմաններում Հացի գյուղի վարչական տարածքի «Կաղնուն տակ» կոչվող տեղամասում իր կողմից շահագործվող «Բելառուս 82-1» տրակտորով գյուղատնտեսական աշխատանքներ կատարելիս հարակից ադրբեջանական մարտական դիրքից հրաձգային զենքից կրակահերթ է արձակվել տրակտորի ուղղությամբ։ Գյուղատնտեսական աշխատանքը դադարեցվել է։

Ոստիկանության Մարտունու շրջանային բաժինը տվյալները փոխանցել է ռուս խաղաղապահներին։

Աղբյուր` Փաստինֆո