Փաստ ինֆո

Ադրբեջանական լրատվամիջոցներով տարածվող տեղեկությունները, թե ռուս խաղաղապահները ազատ մուտք ու ելք են անում Արցախի տարածքում հիմնականում իմիտացիոն բնույթ են կրում։ Այս մասին «Փաստինֆո»-ի հետ զրույցում նշեց Արցախի ԱԺ պատգամավոր Մետաքսե Հակոբյանը:

«Ճանապարհը շարունակում է փակ մնալ։ Իրականում խաղաղապահները դժվարությամբ են անցուդարձ կատարում և նույնիսկ եթե նրանց հաջողվում է իրենց մեքենաներով որոշակի մթերք և դեղամիջոց տեղափոխել, հասկանալի է, որ նրանք այստեղ 2000 հոգի են և այդ, մթերքը և կենցաղային տարբեր իրեր հենց իրենց համար է բերվում»,- նշեց նա։

Պատգամավորի խոսքով, ստեղծված իրավիճակում ռուս խաղաղապահները չեն կարող հումանիտար օգնություն ապահովել շրջափակման մեջ հայտնված 120.000 արցախահայերի համար։ Մեծագույն ցանկության դեպքում անգամ այդ աջակցությունը կարող է հասնել խիստ սահմանափակ թվով անձանց կամ ընտանիքների։ Հակոբյանը, համենայնդեպս, այդպիսի տեղեկություններ չունի։

«Միգուցե կան համայնքներ, որտեղ ինչ-որ աջակցություն է տրվում ինչ-որ կարիքներ ունեցող մարդկանց, ովքեր չեն հասցրել գոնե ինչ-որ չափով պարեն պահեստավորել, բայց հիմնականում այդպիսի շարժ չկա։ Հասկանալի է, որ ռուս խաղաղապահները իրենց մի քանի մեքենայով, այն էլ այդքան արգելքների միջով , 120.000 բնակչի համար չեն կարող պարենի կամ դեղամիջոցների խնդիր լուծել»,- ասաց Հակոբյանը։

Արցախցի պատգամավորի տեղեկություններով` Գորիս-Ստեփանակերտ ճանապարհին կուտակված «բնապահպանների» թիվը հատում է 1000-ի շեմը և այն օրեցօր ավելանում է, ինչը լրջագույն արգելք է ստեղծում անգամ Կարմիր խաչի միջազգային կոմիտեի համար։ Ըստ նրա` թերևս դա է պատճառը, որ վերջինս ռիսկի չդիմեց և Հայաստանում մնացած անչափահաս երեխաներին չտեղափոխեց Արցախ։

«Նույնիսկ անչափահաս երեխաների տեղափոխումն ըստ էության չստացվեց. Ադրբեջանական կողմի արգելանքի պարագայում Կարմիր խաչը չգնաց արկածախնդրության` գիտակցելով, որ իրենց առջև ինչ-որ ագրեսիվ մարդիկ են կանգնած, որոնք հնարավոր է թույլ չտան երեխաների անվտանգ տեղափոխումը»,- նշեց պատգամավորը։

Հակոբյանի դիտարկմամբ` ադրբեջանական օկուպացիայի հետևանքով Արցախն այսօր ոչ թե կանգնած է հումանիտար աղետի շեմին, այլ կարելի է ասել, որ այդ աղետը նույնիսկ սկսվել է։

«Այդ կեղծ բնապահպանները շատ հաստատակամ են ու ակնհայտ է, որ քաղաքական լուծում չտրվելու դեպքում կարելի է ասել, որ այդ աղետը նույնիսկ սկսվել է, որովհետև բացի պարենային խնդիրներից, այսօր ունենք բազմաթիվ առողջական խնդիրներով բնակչություն, որոնք հատուկ հսկողության կարիք ունեն, գնալով իրավիճակի վերահսկողությունը դառնում է անհնարին, այս պարագայում ինչ հումանիտար խնդիրների մասին կարող է խոսք լինել»,- եզրափակեց Հակոբյանը։

Նշենք, որ ադրբեջանական լրատվամիջոցները պարբերաբար տեղեկություններ են տարածում, թե ռուս խաղաղապահների համար դեպի Արցախ ճանապարհը բաց է և նրանք կարողանում են ազատ ելք ու մուտք գործել այնտեղ։

Հիշեցնենք, որ ադրբեջանցի «բնապահպանները» դեկտեմբերի 12-ից փակել են Հայաստանն Արցախին կապող միակ` Գորիս-Ստեփանակերտ ճանապարհը։ Արդեն 23 օր Արցախում բնակվող մեր հայրենակիցները պարենի, անհետաձգելի բուժօգնության ու դեղորայքի խնդիր ունեն։

Աղբյուր` Փաստինֆո