Փաստ ինֆո

Իրանական կողմը կշարունակի համագործակցել Ատոմային Էներգիայի միջազգային գործակալության (ՄԱԳԱՏԷ) հետ, մասնավորապես, միջուկային գործարքի հարցերով: Այդ մասին հայտարարել է Իրանի ԱԳ նախարարի քաղաքական հարցերով տեղակալ եւ Գործողությունների համատեղ համապարփակ ծրագրի (ԳՀՀԾ, միջուկային գործարք) վերականգնման բանակցություններում երկրի ներկայացուցիչ Ալի Բաղերի Քյանին:

«Իրանը, լինելով ՄԱԳԱՏԷ-ի և միջուկային զենքի չտարածման մասին պայմանագրի ազդեցիկ և պատասխանատու անդամ, և որպես միջուկային ներուժ, գիտելիքներ և տեխնոլոգիաներ ունեցող երկիր, ատոմային գիտության ոլորտում միշտ լրջորեն և արդյունավետ համագործակցել Է ՄԱԳԱՏԷ-ի հետ, և ապագայում այդ համագործակցությունը նույնպես անպայման կշարունակվի», – Բաղերի Քյանիի խոսքը մեջբերում է Tasnim գործակալությունը:

2015 - ին Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ը, Ֆրանսիան և Իրանը միջուկային գործարք կնքեցին՝ Գործողությունների համատեղ համապարփակ ծրագիր (ԳՀՀԾ), որը ենթադրում էր պատժամիջոցների վերացում՝ Իրանի միջուկային ծրագրի սահմանափակման դիմաց: 2018-ի մայիսին ԱՄՆ-ը Դոնալդ Թրամփի օրոք դուրս եկավ ԳՀՀԾ-ից և վերականգնեց Թեհրանի դեմ պատժամիջոցները: Ի պատասխան՝ Իրանը հայտարարել է համաձայնագրի շրջանակներում իր պարտավորությունների փուլային կրճատման մասին՝ հրաժարվելով Միջուկային հետազոտությունների, ցենտրիֆուգների եւ ուրանի հարստացման մակարդակի սահմանափակումներից:

Վիեննայում բանակցություններ են ընթացել ԳՀՀԾ-ի վերականգնման և Թեհրանի դեմ Վաշինգտոնի պատժամիջոցների վերացման շուրջ։ 2021 թվականի դեկտեմբերին կողմերը համաձայնության են եկել համաձայնագրի երկու նախագծերի շուրջ, որոնցում Եվրոպական կողմը ներառել է նաև Իրանի դիրքորոշումները։ Իրանի ներկայացուցիչ Բաղերի Քյանիի խոսքով՝ բանակցությունները հաջող են ընթացել, սակայն ԱՄՆ պետքարտուղարության ներկայացուցիչ Նեթ Փրայսը Վիեննայում առաջընթացը գնահատել է որպես համեստ՝ կոչ անելով Թեհրանին հարցին լուրջ վերաբերվել:

Աղբյուր` Փաստինֆո