Փաստ ինֆո

Առաջին հայացքից դիտարկելիս ինքնիշխանությունից հրաժարվելուն ուղղված կոչերը քրեականացնելը հենց ուղղված է ինքնիշխանության ամրապնդմանը, բայց դա թվացյալ է, առերևույթ։ Չեմ կարծում, որ այս իշխանությունը տրամադրված է կամ ի զորու է անելու քայլ, որը հենց ուղղված լինի ինքնիշխանության ամրապնդմանը, որովհետև իրենց կողմից իրականացվող մյուս բոլոր գործողությունները խոսում են հակառակի մասին։ Այս մասին «Փաստինֆո»-ի հետ զրույցում ասաց փաստաբան Վահան Հովհաննիսյանը՝ անդրադառնալով ինքնիշխանությունից հրաժարվելուն ուղղված գործողությունների համար քրեական պատասխանատվություն նախատեսող օրենսդրական կարգավորմանն ավելի լայն մեկնաբանություն հաղորդելու օրենսդրական նախագծին։

Հիշեցնենք, որ երեկ կառավարությունը հավանություն է տվել նախագծին, որը նախատեսում է քրեական պատիժ՝ ինքնիշխանությունից հրաժարվելուն ուղղված գործողություննրի ու հրապարակային կոչերի համար։

Ինքնիշխանությունից հրաժարվելուն ուղղված արարքները կատարելը պատժվելու է ազատազրկմամբ 10-15 տարի ժամկետով, իսկ հրապարակաին կոչերը՝ տուգանքից մինչև մինչև 3 տարի ժամկետով ազատազրկմամբ։

Ուշագրավը, սակայն, Նիկոլ Փաշինյանի մեկնաբանությունն էր։ «Սա նշանակո՞ւմ է, արդյոք, որ որևէ մեկը հրապարակայնորեն չի կարող կոչ անել, օրինակ, ՀՀ-ն որպես պետություն, գոյություն չունենալու մասին և, ընդհանրապես, ինքնիշխանությունը նսեմացնող գործողություններ իրականացնել»,- նշել է Փաշինյանը, ինչին արձագանքելով ՀՀ Արդարադատության նախարար Գրիգորի Մինասյանը նշել էր, որ նման կարգավորումներ առկա էին ՔՕ-ում, որոնք, սակայն, միայն տարածքային ամբողջականությանն ուղղված գործողություններին ու կոչերին են վերաբերում։
Փաստաբան Վահան Հովհաննիսյանից հետաքրքրվեցինք՝ արդյո՞ք սա որպես մահակ չի կարող ծառայել՝ իշխանությունների նկատմամբ ցանկացած քննադատության համար, ինչին արձագաբքելով փաստաբանն արձանագրեց, որ ցանկացած նյութաիրավական նոր նորմ, որը ներառվում է քրեական օրենսգրքում, պետք է բխի նոր ծագած հասարակական հարաբերություններից։
«Այսինքն՝ պետք է առաջանա նոր հասարակական հարաբերություն, որը նախկինում օրենսգրքով կարգավորված չի եղել և, ըստ այդմ, պահանջ՝ այդ հասարակական հարաբերությունը կարգավորելու նյութաիրավական նորմի միջոցով։ Ես չեմ հասկանում՝ ինչ նոր անհրաժեշտություն է առաջացել այս արարքը քրեականացնելու, եթե նախկինում այդ անհրաժեշտությունը չի եղել։ Այդ ո՞ր նոր իրավիճակն էր, որը բխեցրեց այս նորմի ներառմանը։ Սրանից ելնելով էլ գտնում եմ, որ միակ և հիմնական նպատակը հանդիսանալու է որպես մահակ օգտագործելը»,- նշեց Վահան Հովհաննիսյանը։
Հեղինակ՝ Իզաբել Սահակյան

Աղբյուր` Փաստինֆո