Փաստ ինֆո

Նոր տարվա հրաշքին արցախցի բազմաթիվ երեխաներ էլ չեն հավատում։ Դեկտեմբերի 12-ից շրջափակման տարբեր կողմերում հայտնված ու ամեն առավոտ հրաշքի սպասող բալիկները Ձմեռ պապիկից ոչ մի նվեր չեն ուզում, նրանց միակ ցանկությունը տուն հասնելն է։

6-ամյա Արթուրն ու 10-ամյա Գոռն արդեն 19 օր ամեն առավոտ աչքերը բացելուն պես՝ մայրիկին առաջինը հարցնում են՝ այսօր տուն ե՞նք գնալու, ու ամեն անգամ նույն պատասխանը ստանում՝ չգիտեմ, տեսնենք։

«Ամեն օր վեր ենք կենում էն հույսով, որ ճանապարհը կբացվի։ Երեկոյան հուսախաբ եղած՝ քնում ենք։ Առավոտյան հենց վեր ենք կենում, առաջինը հեռախոսներն ենք վերցնում, լուրերը կարդում, հետո զանգում Ստեփանակերտ, հարցուփորձ անում, թե իրենք ինչ նորություն ունեն։ Առավոտյան էլ վեր ենք կացել հույսով, որ գուցե այսօր տուն հասնենք»,- «Փաստինֆո»-ի հետ զրույցում ասում է եղբայրների մայրը՝ Միլենան։
Գոռն ու Արթուրն իրենց տանը տոնածառ էլ չեն հասցնի սարքել, ոչ էլ հայրիկի հետ ամենասիրելի տոնը կկարողանան դիմավորել։ Միլենան ասում է՝ տոնածառն ու խաղալիքները դեկտեմբերի սկզբին՝ Երևան մեկնելուց առաջ էին հանել, նախապատրաստել՝ այն մտադրությամբ, որ վերադառնան ու անմիջապես տոնածառը զարդարեն։ Հիմա տանը՝ Արցախում, միայն հայրիկն է, ինքն էլ, միանշանակ, ոչ սիրտ ունի, ոչ էլ ցանկություն միայնակ տոնածառ զարդարելու։

«Եղբորս աղջիկը՝ Մարիան էլ է մեզ հետ այստեղ՝ Գորիսում մնացել։ Այնքա՜ն էր սպասում, որ Նոր տարին գա ու ինքն իր ձեռքով տոնածառը զարդարի։ Երեկ զանգեցին, թե՝ դնում ենք արդեն տոնածառը, տանն էլի բալիկներ գան. գոնե նրանց մի քիչ ուրախացնելու համար ուզում ենք դնել։ Մենակ տեսնեիք, թե ոնց էր լացում...»,-պատմում է Միլենան։
Մարիան, հորաքրոջ ասելով, շատ զգացմունքային է դարձել ընդհանրապես այս 19 օրերին։ Ամեն անգամ մայրիկի հետ խոսելիս՝ լացում է։ Երեկ էլ եղբոր միամսյակն էր, որին ևս քույրը ներկա չի գտնվել։ Թշնամին փակել է տուն տանող ճանապարհը. և՛ Մարիան, և՛ շրջափակման տարբեր կողմերում հայտնված մյուս արցախցի երեխաները դա շատ գիտեն, բայց մեկ է, անարդար իրականության հետ ոչ մի կերպ չեն կարողանում հաշտվել։

Հիշեցնենք, որ այսօր 19 օր է, ինչ փակ է Արցախը Հայաստանին ու արտաքին աշխարհին կապող միակ ճանապարհը՝ Լաչինի միջանցքը։ Բացի այն, որ 120 հազար արցախահայությունը զրկված է լիարժեք սնվելու և բուժօգնություն ստանալու կարևորագույն իրավունքներից, ավելի քան 1100 ընտանիք էլ շարունակում է մնալ կիսված՝ գտնվելով շրջափակման տարբեր կողմերում։

Նոր տարվա հրաշքին սպասող 270 երեխա զրկված է իր տանը՝ ընտանիքի անդամների հետ, Ամանորը դիմավորելու համեստ ու պարզագույն հնարավորությունից։

Աղբյուր` Փաստինֆո