Փաստ ինֆո

2023թ մտնում ենք շատ ծանր վիճակում, հատկապես, Արցախի մասով: «Փաստինֆո»-ի հետ զրույցում ասել է քաղաքական վերլուծաբան Արմեն Բաղդասարյանը:

Նրա արձանագրմամբ՝ 2022թ-ին տեղի են ունեցել մի շարք իրադարձություններ, որոնց ծանր հետևանքները զգալու ենք նաև 2023թ-ին՝սեպտեմբերյան ծանր ագրեսիան, որի հետևանքով մոտ 240 զոհ ունեցանք, 150 ք/կմ տարածք կորցրինք, Արցախի շրջափակումը, որն արդեն 3 շաբաթ է՝ շարունակվում է: Բանակցային գործընթացը մտել է փակուղի, իսկ հայ-ռուսական հարաբերությունները մտնում են բացահայտ առճակատման փուլ, ինչը շատ վտանգավոր է: Արմեն Բաղդասարյանի դիտարկմամբ՝ բանակցությունների բրյուսելյան կամ արևմտյան հարթակը ևս փակված է, այս ուղղությամբ աշխատանքներն չեն տարվում այլևս:

Ինչ վերաբերում է ներքին քաղաքական կյանքին՝փորձագետն արձանագրում է՝ ընդդիմությունը բավականին լուրջ ռեսուրսներ ուներ, կարծես թե, ասելիք էր ուներ, լուրջ պայքար ծավալեց, բայց ձախողվեց և սպառեց իր հնարավարությունները:

«Սրանք շատ լուրջ ձախողումներ էին, որ չեն ավարտվել և դրանց հետևանքները տեսնելու ենք հաջորդ տարի: Իրավիճակը ծանր է հատկապես Արցախի մասով»,-հավելեց զրուցակիցը:
Հարցին՝ ինչպե՞ս է պատկերացնում Արցախում ստեղծված ճգնաժամի հանգուցալուծումը, ի վերջո ու՞մ ձեռքում է խնդրի լուծման բանալին, Արման Բաղդասարյանը կարծում է ՝ բանալին ռուսական կողմի ձեռքերում է

«Պարզապես, նրանք փորձում են այդ հարցը կարգավորել Հայաստանի վրա ճնշումների միջոցով, փորձում են ստիպել հայկական կողմին, որպեսզի ամբողջովին կամ մասնակի կատարի Ադրբեջանի պահանջները, որի դիմաց միայն հնարավոր կլինի ճանապարհը բացել: Ռուսական կողմը դիրքորոշումը այսպիսին է, կարծում եմ, որ հանգուցալուծումը այպես էլ կլինի՝ ամեն ինչ կախված է նրանից, թե հայկական կողմը ինչ կզիջի»,-ասաց Բաղդասարյանը:

Զրուցակիցը կարծում է, որ ռուսական կողմը ճնշումներ է գործադրում և՛ Ադրբեջանի, և՛ Հայաստանի վրա, բայց Ադրբեջանն այդ ճնշումներին դիմակայելու ռեսուրսներ ունի, իսկ հայկական կողմը՝ չունի.

«Քանի որ պատանդի վիճակով հայերն են՝ Արցախի 120.000 բնակչությունը, ուրեմն ավելի խոցելի է հայկական կողմը,ուստի զիջումների գնալու է հենց հայկական կողմը: Մենք առաջին զիջումը տեսանք, երբ ժամանակավորապես Կաշենի հանքավայրի շահագործումը դադարեցվեց, բայց, ըստ էության, Ադրբեջանը միայն այդ պահանջով չի բավարարվում և լրացուցիչ պհանջներ է առաջ քաշում»,-ասաց փորձագետը:

Հիշեցնենք, որ ՀՀ ԱԽ քարտուղար Արմեն Գրիգորյանը ևս հայտարարել էր, որ ռուսական կողմը ճնշումներ է գործադրում Հայաստանի վրա, որպեսզի մենք Սյունիքով միջանք տրամադրենք Ադրբեջանին և անդամակցենք Միութենական պետությանը:

Արմեն Բաղդասարյանը կարծում է, որ եթե ԱԽ քարտուղարը նման բան է հայտարարել և ռուսական կողմից բացահայտ արհամարհական պատասխանի է արժանացել, ուրեմն պարտավոր է կամ փաստեր ներկայացնել, որ իսկապես ճնշումներ եղել են, կամ պարզաբանումներով հանդես գալ.

«Հայ ռուսական հարաբերությունների լարվածությունների հերթական ալիքը, այն էլ այս իրավիճակում, ամենևին մեր օգտին չէ»,-հավելեց նա:

Աղբյուր` Փաստինֆո