Փաստ ինֆո

Արմեն Գրիգորյանի հայտարարությունները շատ վտանգավոր են, դրանք խորը սեպ են խրում հայ-ռուսական հարաբերություններում: «Փաստինֆո»-ի հետ զրույցում ասել է քաղաքագետ Արա Պողոսյանը՝ մեկնաբանելով ՀՀ ԱԽ քարտուղար Արմեն Գրիգորյանի հայտարարություններն առ այն, որ ՌԴ-ն Հայաստանին ստիպում է միջանցք տրամադրել Ադրբեջանին, անդամակցել միութենական պետությանը:

Արմեն Գրիգորյանը Հանրայինի եթերում հայտարարել էր՝ սեպտեմբերի 13-ին Ադրբեջանի կողմից Հայաստանի ինքնիշխան տարածք ներխուժումը, ինչպես նաեւ Լաչինի միջանցքի փակումը Ռուսաստանի կողմից Հայաստանի վրա բանեցվող ճնշումների շրջանակում են:

Արա Պողոսյանի համոզմամբ՝ նմանատիպ հայտարարությունները բացասական հետևանք են ունենալու հայ-ռուսական հարաբերությունների վրա և Հայաստանի ողջ արտաքին քաղաքականության վրա.

«Այն նաև մարտահրավեր է մեր արտաքին քաղաքականության և դիվանագիտական հարաբերությունների կազմակերպման իմաստով»,-ասել է զրուցակիցը:

Փորձագետը նաև կարծում է, որ այս հայտարարությունները հայ հասարակությանը ինչ-որ պրոցեսների նախապատրաստելուն են ուղղված.

«Ես չեմ հավատում, որ նմանատիպ իրավիճակի դեպքում երկրի քաղաքական էլիտան կհայտարարեր դրա մասին, սա ներքին լսարանի համար որոշակի ուղերձ էր՝ ինչ-ինչ ձախողումներ արդարացնելու համար: Մինչ այս էլ քարոզ էր տարվում ՀԱՊԿ-ից Հայաստանի դուրս գալու հետ կապված, ինչը նշանակում է, որ Հայաստանի քաղաքական էլիտայի մի որոշ հատված հակված է գործընթացները տանել այնպես, որ Հայաստանը վերջնականապես արևմտյան կողմնորոշում ունենա, կարծում եմ՝ իրենք առաջին հերթին աշխատելու են հայ-ռուսական հարաբերությունները բացասական ուղղությամբ տանելու համար»,-ասել է Արա Պողոսյանը:

Նշենք, որ ռուսական կողմը կոշտ էր արձագանքել Արմեն Գրիգոյանի այս հայտարարություններին.

ՌԴ նախագահի մամուլի խոսնակ Դմիտրի Պեսկովը ՀՀ անվտանգության խորհրդի քարտուղար Արմեն Գրիգորյանի հայտարարությունները սադրիչ է գնահատել։

«Նմանատիպ հայտարարությունները կարելի է դիտարկել որպես սադրիչ։ Դրանք իրականությանը չեն համապատասխանում։ Ռուս պաշտոնյաներից որևէ մեկը դա չի ասել և ոչ մեկի միջոցով դա չի ներկայացվել հայկական կողմին»,– ասել է Պեսկովը:

Արա Պողոսյանը Պեսկովի այս հայտարարությունը մեկնաբանում է երկու տեսանկյունից.

«Եթե նման բան չկա, բնականաբար, սա իսկապես սադրանք էր և ռուսական կողմը հենց այդպես էլ պետք է արտահայտվեր, իսկ եթե նման մտադրություն կա, ապա ռուսական կողմը բացեիբաց չի հայտարարելու, որ նման նպատակներ ունեն: Թեև եթե հայտարարել էին, ոչինչ իրենց չէր խանգարելու, դա իրականացնելու համար»,- նշել է քաղաքագետը:

Աղբյուր` Փաստինֆո