Փաստ ինֆո

Ինչու՞ է կառավարությունը որոշել «Ռազմական դրության մասին» օրենքը փոփոխությունների ենթարկել՝ նախատեսելով գործող օրենքի համեմատ՝ խստացնել ռազմական դրության ժամանակի սահմանափակումները։ Ըստ այդմ, նախատեսվում է «ՀՀ տարածքում ինտերնետային կայքերի, սոցցանցերի, ինտերնետային հավելվածների գործողության ժամանակավոր կասեցում /արգելափակում/, ինչպես նաև՝ ինտերնետ հասանելիության մասնակի կամ ամբողջական սահմանափակում։

Հարց՝ ինչու՞ հիմա է դա արվում։

Եվ հետաքրքիր է, թե ինչու՞ 44-օրյա պատերազմի ժամանակ, երբ ազարբայջանի բոլոր ցանցերը փակ էին, ընդ որում, նաև սեփական ժողովրդի համար էլ մեծ սահմանափակումներ կային, Հայաստանի օդն էլ, սոցցանցերն էլ բաց էին։ Իսկ վարչապետը օրումեջ «լայվ» ռեժիմով հրապարակային հայտարարություններ էր անում, որոնք թշնամու համար կարևոր տեղեկատվություն էին հանդիսանում, քանի որ ներառում էին մեր զինուժի վերաբերյալ կարևոր և կոնկրետ թվեր, գործողություններ։

Այդ տեքստերը՝ բառ առ բառ տարածում էին առցանց լրատվամիջոցները, սոցցանցերում քննարկումներ էին ծավալվում, իսկ ազարբայջանցիներն այդ ամենին հետևում էին, «քոմենթներ» գրում, պատկան մարմիններն էլ՝ համապատասխան հրահանգներ տալիս։

Ավելին, պատերազմի ժամանակ նույնիսկ մերոնց ձեռքին եղած սմարթֆոնների օգնությամբ էր թշնամին տեղորոշվում․․․

Այդ անսահմանափակ բացությունն այն ժամանակ նաև նրա համար էր, որ ցանցային բոլոր միջոցներով հնարավորինս բարձր ու համոզիչ, նաև՝ համատարած հնչեր Արծրուն Հովհաննիսյանի «հաղթելու ենք», «հաղթելու ենք»-ի ձայնը։ Այնքան բարձր, որ իրական պատկերը ներկայացնողներին չհավատային, որ դեպքի վայրից եկող վստահելի մարդկանց ինֆորմացիաները թերահավատությամբ ընդունեին նաև լրատվամիջոցները․․․

Հայաստանում 2020-ի 44-օրյայի ժամանակ իշխանության քարոզչությունը հաղթեց իրականությանը, իսկ դառն ու դաժան իրականությունը մեկ նախադասությամբ շոկի մատնեց սոցցանցերում «հաղթելու ենք»-ի գերին դարձած հայերին, որ հավատում էին , թե՝ «Գետաշենն են հասել մերոնք ու այն գրավել»։

Իսկ թշնամին «տան երդիկից» մտել էր անառիկ Շուշի և նոյեմբերի 7-ին հայտարարել, թե Շուշին «մաքրված է», մինչդեռ նոյեմբերի 8-ին ՀՀ ՊՆ ներկայացուցիչ Արծրունը Հովհաննիսյան գրառում էր կատարել , թե՝ «Ծանր ու վճռական մարտեր են Շուշիի համար, հաղթանակ մեջ հերոսներին»։ Փաշինյանը նոյեմբերի 9-ին էր նույնաբովանդակ գրառում արել՝ թե՝«Շուշիի համար մարտերը շարունակվում են», այդպիսով, ըստ էության, ամրապնդելով ՊՆ ներկայացուցչի սուտը։

Այ, սրա համար էր, որ այն ժամանակ իշխանությունները ՀՀ տարածքում բոլոր ինտերնետային կայքերն ու սոցցանցերը բաց էին թողել, թափանցիկ ու հասանելի։ Իրականությունն էր անհասանելի։ Դե, իսկ հիմա իշխանությունը բոլոր կողմերից որպես ամուր պարիսպ ոստիկանապատված է և նրան խանգարողը լրատվամիջոցներն ու սոցցանցերն են, որ հանրությանը իրական տեղեկատվություն են փոխանցում։ Բնականաբար, այս օրենքը նախատեսված չէ պետական համակարգերի համար, որոնք մեկ անձի կամակատարն են և կատարելու են Արծրուն Հովհաննիսյանի դերը։

Թշնամուն իր մուրազին հասցրած իշխանության խնդիրն այսօր այլ է։ Այն է՝ սեփական ոստիկանական բռնի ուժով ամեն գնով պահել սեփական իշխանությունը։

Աղբյուր` Փաստինֆո