Փաստ ինֆո

Ադրբեջանցիները նախապայմաններ են առաջ քաշել՝ Լաչինի միջանցքը բացելու համար, բայց Արցախի իշխանությունները պնդել են, որ Արցախը Հայաստանին ու արտաքին աշխարհին կապող ճանապարհը պետք է բացվի առանց որևէ նախապայմանի ու վերականգնվի այն վիճակը, որը կար մինչև դեկտեմբերի 12-ը։ Այդ մասին «Փաստինֆո»-ի հետ զրույցում ասաց Արցախի ԱԺ ՀՅԴ խմբակցության ղեկավար Արթուր Մոսիյանը։

«Արցախի իշխանությունները պարզ ասել են, որ միջանցքը բացելուց հետո պատրաստ են ցանկացած հարց քննարկել Ադրբեջանի հետ, բայց միջանցքը պետք է բացվի առանց որևէ նախապայմանի։ Եթե այս անգամ ևս բավարարվի ադրբեջանական կողմի որևէ նախապայման, ապա դա կնշանակի Արցախի հայաթափում»,-ասաց Մոսիյանը։

Ստեղծված իրավիճակում ՀՀ իշխանությունների պահվածքը, Մոսիյանի խոսքով, առնվազն ազնիվ չէ՝ հաշվի առնելով, նախ և առաջ, այն, որ ՀՀ-ն հանդիսանում է Արցախի անվտանգության երաշխավորը։
«Բացի այդ, եռակողմ համաձայնագիրը ստորագրել է նաև ՀՀ ղեկավարը՝ Արցախի անունից, և առնվազն ազնիվ չէ, որ այս իրավիճակում մի կողմ են քաշվել Հայաստանի իշխանությունները և ասում են, թե միայն խաղաղապահների տիրույթում է խնդիրը։ Արցախի կենսական տարածքի մեծ մասը թշնամուն հանձնվել է ՀՀ վարչապետի ստորագրությամբ։ Նրա ստորագրությամբ է նաև Լաչինի միջանցքի կարգավիճակը հաստատվել։ Այդքանից հետո առնվազն համարժեք, ադեկվատ չէ ՀՀ ղեկավարության գործելաոճը»,-շեշտեց պատգամավորը։

Մոսիյանը նկատում է՝ երբ որևէ մեկն ասում էր, որ ՀՀ իշխանությունները «ձեռքերը լվացել է» Արցախից, հակադարձում էին իշխանական ապարատից, թե այսքան գումար է հատկացնում Արցախին, բայց մոռանում էին, որ իրենց ապիկար քաղաքականության հետևանքով է Արցախը հայտնվել հումանիտար աղետի մեջ, ու այդ գումարով փորձում են մեղմացնել այդ աղետը։

«Արցախի հարցին ՀՀ իշխանություններն ադրադառնում են միայն այն ժամանակ, երբ հակառուսական հիստերիա են ուզում բարձրացնել, բայց մոռանում են, որ ռուս խաղաղապահներ են հիմա Արցախում կանգնած։ Որքանով տեղյակ եմ, հիմա խաղաղապահները բանակցում են՝ միջանցքը բացելու համար, բայց որևէ արդյունք առ այս պահը, բանակցությունները չեն տվել։ Հումանիտար աղետ է հասունանում, ճիշտ է, թեկուզ այն պարզ պատճառով, որ օրական 400 տոննա սննդամթերք ու դեղորայք էր մտնում Արցախ, իսկ այս 16 օրերին ընդամենը 10 տոննա հումանիտար բեռ է հասել։ Այդուհանդերձ, Արցախի ժողովուրդն ու իշխանությունները միակամ են, որ որևէ զիջում չպիտի արվի»,- շեշտեց Արթուր Մոսիյանը՝ հավելելով, որ այդ դիրքորոշումը հարգելով՝ ՀՀ ղեկավարությունն ու միջազգային հանրությունը պետք է անհապաղ գործուն քայլեր ձեռնարկեն՝ կյանքի ճանապարհը բացելու համար։

Աղբյուր` Փաստինֆո