Փաստ ինֆո

Մեծ Բրիտանիայում հղի կինը հրաժարվել է հավատալ բժիշկներին, որոնք իր երեխային մահացած են ճանաչել եւ երկար սպասված որդի է լույս աշխարհ բերել: Այս մասին հայտնում է Daily Mail-ը։

27-ամյա Հաննա Քոուլին հոսպիտալացրել են հղիության 20-րդ շաբաթում այն բանից հետո, երբ նրա պտղաջրերն անսպասելիորեն արտահոսել են։ Հետազոտության ժամանակ բժիշկները չեն կարողացել հայտնաբերել երեխայի սրտի բաբախյունը եւ որոշել են Քոուլին արհեստական ծննդաբերություն նշանակել։ Սակայն, ինչպես պնդում է կինը, նա զգացել է, որ երեխան ողջ է եւ չի հավատացել բժիշկների եզրակացությանը։ Նա խնդրել է ևս մեկ սկանավորում անել։

Արդյունքում կանխազգացումը չի խաբել Քոուլին, եւ կրկնակի հետազոտության ժամանակ բժիշկները հայտնաբերել են երեխայի սրտի բաբախյունը։ Մասնագետները ներողություն են խնդրել հիվանդից սխալմունքի համար եւ շարունակել հետեւել նրա վիճակին։

Հղիության 24-րդ շաբաթում բրիտանուհին ընդամենը 780 գրամ քաշով տղա է լույս աշխարհ բերել։ Նա իր որդուն անվանել է Օքլի: Ծնվելուց անմիջապես հետո նրան տեղափոխել են ինտենսիվ թերապիայի բաժանմունք։ Այնտեղ երեխայի մոտ ախտորոշվել է նեկրոզացնող էնտերոկոլիտ՝ հիվանդություն, որը հանդիպում է անհաս կամ հիվանդ նորածինների մոտ։ Այն բնութագրվում է լորձաթաղանթի կամ աղիքների ավելի խորը շերտերի նեկրոզով:

Քոուլի խոսքով՝ ինքը կարող է վերջապես որդուն տուն տանել փետրվարին։ «Ես չեմ կարող համբերել, թե երբ նա տուն կգա, և ամբողջ ընտանիքս հավաքվի միասին», - եզրափակեց նա:

Աղբյուր` Փաստինֆո