Փաստ ինֆո

Անհրաժեշտ է ձևավորել համահայկական միացյալ դաշինք: Այս մասին «Հայաստանն ու Արցախը լրջագույն մարտահրավերների առաջ են» խորագրով քննարկման ժամանակ հայտարարեց ԱԺ նախկին պատգամավոր, Երևանի նախկին քաղաքապետ, Երկրապահ կամավորական միության անդամ Ալբերտ Բազեյանը:

Նրա համոզմամբ՝ որևէ քաղաքական ուժ առանձին ոչինչ չի կարող բան փոխել.

«Մի քանի կուսակցությունների դաշինքն անգամ չկարողացավ փոխել: Մենք տեսանք «Դիմադրության շարժման» արդյունքը, մեր ժողովուրդը ընտրություն չուներ։ Կամ պետք է ընտրեին նախկիններին, կամ էլ՝ Նիկոլ Փաշինյանին, ցավոք սրտի, մեր ժողովուրդն ընտրություն կատարեց նախկիններին մերժելով և նորից ընտրեց ՔՊ-ին»,-ասաց նա:

Ալբերտ Բազեյանը հայտարարեց, որ նախկին իշխանությունները չպետք է մասնակցություն ունենան նոր ձևավորվող համախմբանը.
«Նոր ուժեր են պետք: Մեր միասնականությունը կարող է հույս ներշնչել հասարակությանը, որ կարող է մեր երկրում փոփոխություններ իրականացվեն»,-ասաց նա:

Ինչ վերաբերվում է երկրում այսօր տիրող իրավիճակին՝ բանախոսն արձանագրում է՝ կադրային ճգնաժամ է, սոցիական բևեռացումը խորանում է, պաշտոնյաների աշխատավարձերը բարձրացնում են, իսկ կենսաթոշակները մնում են նույնը.

«Մեր երկրի ղեկավարին ինչ ասես՝ չեն ասում, ես ինձ նվաստացած եմ զգում, երբ տեսնում եմ՝ ինչպես է նա իրեն պահում իր շփումներում, հատկապես արտաքին հարաբերություններում»:

Աղբյուր` Փաստինֆո