Փաստ ինֆո

Հայաստանի իշխանությունները և Ադրբեջանը համատեղ ընդդեմ ռուս խաղաղապահների գործընթաց են տանում, որը համակարգվում է մի կենտրոնից՝ Թուրքիայից կամ ավելի բարձր կենտրոնից՝ Մեծ Բրիտանիայից: «Փաստինֆո»-ի հետ զրույցում նման կարծիք է հայտնել ռազմական փորձագետ Հայկ Նահապետյանը։

«Նույն ժամանակում, նույն թեզերով, նույն կեցվածքով ռուս խաղաղապահների դեմ գործընթաց է տարվում: Տեսականորեն, եթե ռուս խաղաղապահներն Արցախում չլինեն, բնակչության քանի՞ տոկոսը կմնա Արցախում, բնականաբար, մեծ մասը դուրս կգա: Այսինքն՝ այս պահին մեր հայրենակիցների Արցախում մնալու հանգամանքը պայմանավորված է ռուս խաղաղապահների ներկայությամբ։ Խնդիրն այն է, որ ռուս խաղաղապահներին ուժ կիրառելու մանդատ տրված չէ, նրանք կարող են զենք կիրառել միայն այն դեպքում, երբ իրենց վրա հարձակում լինի»,-ասաց նա:

Փորձագետը շեշտում է՝ Հայաստանը ՄԱԿ-ի ԱԽ-ում քննարկման ժամանակ պետք է հետամուտ լիներ, որ խաղապահները ուժ կիրառելու մանդատ ստանան, որպեսզի կարողանան զենք կիրառել, այն դեպքում, երբ ճանապարհը փակվում է կամ երթևեկելիս խոչընդոտ կա:

Հայկ Նահապետյանի համոզմամբ՝ փորձ է արվում ռուս խաղաղապահներին դուրս մղել տարածաշրջանից, որպեսզի ՄԱԿ խաղաղապահների դրոշի ներքո այլ խաղաղապահներ բերեն մեր տարածաշրջան.
«Իսկ դրանք ՆԱՏՕ-ի ստորաբաժանումներ են լինելու, խաղաղապահների այլ ռազմաքաղաքական դաշինք չկա, բացի՝ ՀԱՊԿ-ից և ՆԱՏՕ-ից: Սկզբում առաջարկ կլինի, որ դիտորդներ գան, իսկ նրանց աշխատանքի ավարտից հետո, կառաջարկվի որ խաղաղպահներ գան»,-ասաց նա:

Փորձագետը չի բացառում, որ ռուս խաղաղապահների հատ համատեղ՝ ՆԱՏՕ-ի ստորաբաժանումներ բերվեն տարածաշրջան:

Հայկ Նահապետյանի դիտարկմամբ՝ նման սցենարի դեպքում չի բացառվում տարածաշրջանում լայնամասշտաբ պատերազմ սկսվելը.

«Ռուսաստանը Ուկրաինայում այս պահին պատերազմում է ՆԱՏՕ-ի դեմ, այսինքն, կստացվի, որ հակամարտող երկու կողմերի ստորաբաժանումները նույն տարածքում են, սա նաև կարող է մեծ բախումների պատճառ դառնալ»,-ասում է Հայկ Նահապետյանը:

Աղբյուր` Փաստինֆո