Փաստ ինֆո

Վարչապետը և իր կինն արդեն բաց են խաղում: Առաջ՝ խոնարհվում էին, սիրում էին ու նման բաներ ասելով թիկունքից մահացու հարվածներ հասցնում, իսկ հիմա արդեն բաց են խաղում, նրանց համար բարոյական ոչ մի նորմ չկա: Ամեն ձևով ցույց են տալիս, որ Արցախը իրենց համար գոյություն չունի: «Փաստինֆո»-ի հետ զրույցում ասել է հոգեբան Կարինե Նալչաջյանը՝ մեկնաբանելով Աննա Հակոբյանի երեկվա գրառումը, որտեղ նա արդեն 15 օր շրջափակման մեջ գտնվող արցախցիներին մեղադրել էր, թե օգտագործում են երեխաներին՝ միջազգային հանրության մոտ խղճահարություն առաջացնելու նպատակով.

«Արցախի մեծահասակները երեխաների ձեռքները սրտաճմլիկ գրառումներ են տալիս, կանգնեցնում են տոնածառների առաջ ու լուսանկարում: Լացացնող տեքստեր են սովորեցնում ու տեսանկահարանում, նրանց մասնակցությամբ տարբեր ակցիաներ են կազմակերպում եւ այդ ամենը տարածում են աշխարհով մեկ, որպեսզի խղճահարություն հարուցեն, վրաններ ապամոնտաժվեն»,-գրել էր նա:

Հոգեբան Կարինե Նալչաջյանի մեկնաբանությամբ՝ Աննա Հակոբյանն իր այս գրառմամբ ցանկանում է միջազգային հանրությանը ցույց տալ, թե Արցախում ոչ մի խնդիր չկա և պետք չէ ուշադրություն դարձնել այնտեղ կատարվողին.
«Միջազգային հանրությանը մեսիջ են ուղղում, թե լուրջ բան չկա, ո՞նց կարելի է երեխաների միջոցով տրամադրություններ ստեղծել:Մարդկային ցանկացած զգացում բացակայում է նրա մոտ: Փաստն այն է, որ Արցախում թե՛ մեծերը, թե՛ երեխաները գոյության վտանգի առաջ են կանգնած, Արցախը պաշարված է, ուզում են ջլատել և արյունաքամ անել այն, ընդ որում՝ թե՛ մեր արտաքին, թե՛ ներքին թշնամիներն են դա ուզում: Այդ կինը մեզ նորից խոցում է, մեր հասարակության ամենանուրբ լարերին է կպնում: Տպավորություն է, որ նրանք ողջ հայությանը ծաղրում են»,-ասում է զրուցակիցը:

Կարինե Նալչաջյանը նշում է՝ վարչապետի կինը հատուկ միսիա է կատարում՝ ժողովրդին հոգեպես ջլատելու ու կոտրելու, հոգեբանական հարված հասցնելու.

«Մենք հո լավ ենք հիշում, որ երբ իրենց հեղաշրջումն անում էին, ինչպես էին երեխաներին օգտագործում, երեխաները մեքենաների անիվների տակ էին պարկում, նրանց բաժիններ էին տանում, և ամենասարսափելին՝ այդ նույն երեխաներին հետո բայրաքթարների տակ սպանեցին: Ով-ով, իրենք իրավունք չունեն երեխաներին օգտագործելուց խոսել: Արցախում երեխաներն իսկապես վտանգված են, մարդասիրական շատ լուրջ ճգնաժամի առաջ են կանգնած:

Վարչապետի տիկինը փոխանակ մարդկային կերպարով հանդես գա, լրիվ հակառակն է անում»,-ասում է Կարինե Նալչաջյանը:
Աննա Հակոբյանի այս գրառումը տեղ գտավ նաև ադրբեջանական մի շարք լրատվամիջոցներում: Թշնամին. վկակակոչելով նաև Աննա Հակոբյանի գրառումը, փորձում էր միջազգային հանրությանը ցույց տալ, թե Արցախի երեկվա բազմահազարանոց հանրահավաքը կազմակերպված է եղել:

Կարինե Նալչաջյանի խոսքով՝ վարչապետի կինը դա հենց նրա համար է գրել, որպեսզի «ադրբեջանցիների բերանը լեզու դնի».

« Ըստ էության, իրենք տանդեմով են աշխատում, թուրք-ադրբեջանական տանդեմը և մեր իշխանությունները համահունչ աշխատող մեքենաներ են, համատեղ աշխատանքի արդյունք է»,-ասաց նա:
Հոգեբանը պատահական չի համարում նաև այն, որ Աննա Հակոբյանն իր այդ գրառումն արել է հենց այն օրը, երբ Արցախում կարևոր հանրահավաք պետք է լիներ.

«Հանրահավաքը լուսաբանվելու էր միջազգային լրատվամիջոցների կողմից, տարբեր արձագանքներ էին լինելու, ինքը ուզում է այդ ամենը վարկաբեկել և ուրիշ երանգ տալ:Իրենք շատ լավ են ընտրում օրը, ժամանակը և սիմվոլիկան: Սա է մեր իրականությունը: Նայում ես՝ երեխաներ են, ընտանիքներ են վտանգված, և, ահա, հանդիպում ենք Հայաստանի նման արձագանքին, որ ոչ միայն չեն աջակցում Արցախին, այլ մի հատ էլ հարված իրենք են հասցնում»,-ասումէ Կարինե Նալչաջյանը:

Աղբյուր` Փաստինֆո