Փաստ ինֆո

Արցախը, արցախցին և պայքարող հայը Ստեփանակերտի հանրահավաքի ժամանակ ցույց տվեցին, որ անկոտրում են և շարունակելու են պայքարել իրենց հայրենիքում: Այս մասին այսօր լրագրողների հետ զրույցում հայտարարել է «Հայաստան» խմբակցության ղեկավար Սեյրան Օհանյանը:

«Այստեղ ես ուզում եմ բարձր գնահատել Ռուբեն Վարդանյանի դերակատարությունը: Մարդիկ տարբեր բաներ են խոսում, բայց նրա հայրենասիրական ոգին, աշխատանքի փորձը, կառավարման ունակությունները, նաև բարեգործական ունակությունները թույլ կտան, որ կանգնի արցախցու կողքին և շարունակի պայքարը:

Ռուբեն վարդանյանն իր ելույթում ասաց, որ երեք տարբերակ կա՝ կամ հայտնվել Ադրբեջանի կազմում, այն ինչը ՀՀ իշխանություններն են ուզում, բայց դա մեր ժողովրդի համար անընդունելի է: Երկրորդ տարբերակը՝ թողնել, դուրս գալ: Նույնիսկ եթե ճանապարհը բաց լինի, արցախցիները դրան դեմ են: Մնում է երրորդ տարբերակը՝ պայքարել, իսկ պայքարի մեջ մենք իրավունք չունենք արցախցուն մենակ թողնելու: ՀՀ իշխանություններն այսօր կարծես թողել են միայնակ արցախցում, չնայած պարբերաբար խոսում են, թե ինչ պետք է, Արցախին հատկացնում են»,-ասաց Օհանյանը:

Ինչ վերաբերում է վերջերս ՀՀ արտգործնախարարի՝ ՌԴ-ում նախատեսված եռակողմ հանդիպումից հրաժարվելուն, Սեյրան Օհանյանը նշեց, որ անընդունելի է բանակցություններին չմասնակցելը.
« Ընդհակառակը, բանակցությունների վայրն այն հարթակն է, որտեղ դու կարող ես գնալ համայն աշխարհին, ինչպես նաև դիմացի մարդկանց բացատրել՝ որոնք են մեր շահերը»,-ասաց Օհանյանը:
Ըստ ընդդիմադիր պատգամավորի՝ իշխանությունները հայտնվել են այսպիսի իրավիճակում, որովհետև երկակի խաղեր են տանում.
«Առաջինը ՌԴ-ն, որը տեղում, գետնի վրա միակ երաշխավորն է Արցախի իր խաղաղապահի գործունեությամբ, չնայած այդտեղ էլ որոշակի խնդիրներ կան, բայց Արցախի ու հայ ժողովրդի շահերի համար պետք է պայքարել: Մյուս կողմից իրենք գնում են դեպի Արևմուտք, դեպի վաշինգտոնյան փաստաթուղթ, պայմանավորվածություններ»,-ասաց Օհանյանը:

Աղբյուր` Փաստինֆո