Փաստ ինֆո

«Մարտի 1»-ի գործով ցուցարար Զաքար Հովհաննիսյանի սպանության մեջ մեղադրվող ոստիկանության զորքերի շտաբի նախկին պետ Գեղամ Պետրոսյանի գործը շարունակում է մնալ «սառեցված»։ Նախաքննական մարմինը քրեական վարույթի շրջանակներում արդեն տևական ժամանակ է, ինչ որևէ գործողություն չի իրականացնում, բայց հրաժարվում է կարճել վարույթը։ Գեղամ Պետրոսյանի պաշտպան Վաղարշակ Գևորգյանը «Փաստինֆո»-ի հետ զրույցում նշեց, որ վարույթն իրականացնող մարմինը կամայական, ապօրինի ձևով շարունակում են նույնությամբ պահպանել առաջադրված մեղադրանքի բովանդակությունը՝ առանց որևէ հիմնավորման մերժելով ու հետաձգելով ներկայացված միջնորդությունը։

Նշենք, որ պաշտպանը միջնորդություններ էր ներկայացրել՝ պահանջելով կարճել վարույթը, սակայն նախաքննական մարմինը հետաձգել է միջնորդությունների լուծումը՝ մինչև նոր հանգամանքների ի հայտ գալը։
«Մինչև օրս տարիներ շարունակ որևէ քննություն չի կատարվել, չի կատարվում, համոզված եմ՝ չի էլ կատարվելու, որովհետև որևէ հիմք, որևէ փաստական հանգամանք պարզելու անհրաժեշտություն չկա, ամեն ինչ շատ ավելի հստակ և պարզ է՝ քան իրենք կարող են պատկերացնել»,- ընդգծեց Վաղարշակ Գևորգյանը։

Նշենք, որ «Մարտի 1»-ի գործով երկու մեղադրյալի՝ Սաշա Աֆյանի և Հովհաննես Թամամյանի նկատմամբ վարույթն իրականացնող մարմինը քրեական հետապնդումը դադարեցնելու մասին որոշում է կայացրել՝ քրեական պատասխանատվության ենթարկելու վաղեմության ժամկետներն անցած լինելու հիմքով։ Գեղամ Պետրոսյանը մեղադրվում է ՀՀ ՔՕ 104-րդ հոդվածով՝ սպանության հատկանիշներով և նրա պարագայում ենթադրյալ հանցագործության համար պատասխանատվության ենթարկելու վաղեմության ժամկետները դեռևս չեն ավարտվել։ Բացի այդ՝ վաղեմության հիմքով գործի վարույթը կարճելու համար անհրաժեշտ է, որ մեղադրյալներն ընդունեն իրենց մեղքը։ Իսկ այս պարագայում անգամ ՀՔԾ-ն գիտի, որ նման ծանր մեղադրանքի համար չունի որեւէ հիմք, ապացույց։

Հիշեցնենք, որ ավելի քան երեք տարի առաջ ՀՔԾ-ն հայտարարեց, թե, իբր, բացահայտել են 2008 թվականի մարտի 1-ին արձանագրված 10 մահվան դեպքերից մեկը եւ հրազենի գործադրմամբ Զաքար Հովհաննիսյանին դիտավորությամբ կյանքից զրկելու համար մեղադրանք է առաջադրվել 2008 թվականի մարտի 1-ի դրությամբ ՀՀ ոստիկանության զորքերի հրամանատարի տեղակալի, շտաբի պետի պաշտոնը զբաղեցրած Գեղամ Պետրոսյանին։ Իսկ 2019 թվականի հունիսի 7-ին հայտնի դարձավ, որ դատարանը բավարարել է նրան կալանավորելու միջնորդությունը։

Զաքար Հովհաննիսյանը հրազենային վնասվածք է ստացել որովայնի շրջանում՝ Մաշտոցի պողոտայի մոտակայքում՝ 2008 թվականի մարտի 1-ի ուշ երեկոյան՝ Մակարով տեսակի ատրճանակի արձակված կրակոցի հետեւանքով։

Գ.Պետրոսյանին մեղադրանք առաջադրելու մասին հայտարարելով ՀՔԾ-ն այդպես էլ չէր մանրամասնել, թե արդյոք սպանությունը կատարվել է տաբելային զենքով եւ արդյոք հանցագործության գործիք հանդիսացած ատրճանակը հայտնաբերվել է։ Հետագայում արդեն պարզ դարձավ, որ զենքը չի հայտնաբերվել, հետեւաբար չկա որեւէ ապացույց, որ Գ.Պետրոսյանին ամրակցված զենքով է արձակվել կրակոցը, որով Զ.Հովհաննիսյանին պատճառվել է կյանքի համար անհամատեղելի վնասվածք։ ՀՔԾ-ի կեղծ փուչիկը պայթեց, երբ ընդամենը երկու ամիս անց՝ 2019 թվականի օգոստոսի 4-ին, Գ.Պետրոսյանն ազատ արձակվեց Երևան-Կենտրոն քրեակատարողական հիմնարկից, քանի որ լրացել էր կալանքի երկամսյա ժամկետը, իսկ նախաքննական մարմինը՝ ՀՔԾ-ն, կալանավորման ժամկետը երկարացնելու մասին միջնորդություն չէր ներկայացրել։

Հեղինակ՝ Իզաբել Սահակյան

Աղբյուր` Փաստինֆո