Փաստ ինֆո

Ամեն իշխանություն ցանկանում է ոչ միայն արդարադատությունը ենթարկեցնել իրեն, այլև՝ հարմարեցնել; Չունենք և երբեք չենք ունեցել անկախ դատական իշխանություն, եռաստիճան հիերարխիա, հիմա էլ չունենք։ Այս մասին «Փաստինֆո»-ի հետ զրույցում ասաց նախկին դատավոր Պարգև Օհանյանը՝ ամփոփելով 2022թ. ու թե ինչ ազդեցություն է այն ունեցել արդարադատության որակի վրա։

«Խորհրդարանական կառավարման ձևը շատ սխալ է։ Պարլամենտական պետության էությունն այն է, որ ձևավորվում է, իբրև, թե իշխող կուսակցություն, որը գալիս է իշխանության, հետո՝ ձևավորում է իբրև թե անկախ գործադիր իշխանություն, բնականաբար, գործադիր իշխանությունը ինչ օրենսդրական նախաձեռնություն ցուցաբերում է, օրենսդիրն ընդունում է, մյուս խմբակցություններն ինչքան ուզում են իրենց ճղեն, միևնույն է, անիմաստ է նրանց գոյությունը»,- նշեց Օհանյանը՝ հավելելով, որ իշխանությունն ինչ ցանկանում անում է, այդ թվում՝ օրենսդրության, դատական իշխանության հետ, որի ամբողջ նպատակը ոչ թե դատական իշխանությունն անկախացնելն է, այլ՝ ուղղակի ենթարկեցնելն է իրենց։

Օհանյանի խոսքով՝ ինքը նույնպես մի շրջանում հավատում էր անցումային արդարադատությանը, հավատում էր, որ կարող են ինչ-որ բան փոխել, մինչդեռ, այսօր իրականությունն այն է, որ՝ «ով մեզ հետ է, կարող է հանգիստ աշխատել, իսկ ով մեր հետ չէ՝ մեր դեմ է, ինչպես սիրում են ցիտել Աստվածաշնչից՝ Աստվածաշունչն ատող մարդիկ, թեև Աստվածաշնչում Հիսուսը բոլորովին այլ բան ունի »։

Պարգև Օհանյանը հիասթափված է արդարադատության իրականացումից, նշեց՝ հույս էլ չունի, որ ինչ-որ բան կուղղվի։

Դիտարկմանը, որ ստեղծվել են նոր դատարաններ՝ Հակակոռուպցիոն, մինչդատական վարույթի, սակայն հանրային վստահությունը դատարանների նկատմամբ չի բարձրացել, որակը չի բարելավվել, այսինքն՝ միայն դատարանի շենքերի անունը փոխելո՞վ են բարեփոխում իրականացնում, ոչինչ չի՞ փոխվել, Օհանյանն արձագանքեց. «Այո, ոչինչ չի փոխվում։ Միայն ֆորմալ առումով փոփոխություններ կան»։ Մինչդատական վարույթի դատարաններն առանձնացնելը Պարգև Օհանյանը դրական փոփոխություն համարեց՝ նշելով, որ դրա մասին բազմիցս էր բարձրաձայնել, իրեն վերջապես լսել և ստեղծել են, սակայն, ինչպես պարզվում է՝ օրենսդրական փոփոխություններով այդ դատարանը կկազմալուծվի, իսկ դատավորները կդառնան ռեզերվային։ Օհանյանի դիտարկմամբ՝ գուցե՝ դատավորները չեն արդարացրել իրենց, օրինակ, Արուսյակ Ալեքսանյանը, թեև իրեն չի հետաքրքրում, թե ինչ է արել դատավորը, սակայն չին բացառում, որ խնդիրներ են առաջացել, չի կալանավորել այն անձանց, որոնց պետք է կալանավորեր։ Միևնույն ժամանակ, նախկինում գործող կարգավորումների դեպքում, երբ դատարանների հերթապահություն էր սահմանվում և դատարանները բացի բուն գործերից քննում էին նաև մինչդատական վարույթի գործեր, դատավորները նիստ էին նշանակում նախապես, սակայն հրատապ միջնորդությունների դեպքում նախապես նշանակված նիստերը տապալվում էր, ձևական բնույթի քննվում էր միջնորդությունները, որոնք հիմնականում բավարարվում էին։

«Ինչ-որ դրական փոփոխությունների հույս կար, բայց ստացվեց այնպես, որ «хотели как лучше, но получилось как всегда»,- նշեց Օհանյանը։

Հեղինակ՝ Իզաբել Սահակյան

Աղբյուր` Փաստինֆո