Փաստ ինֆո

Ռուս խաղաղապահներն ավելի կոշտ միջոցներով պետք է կարողանային հենց առաջին օրն ապաշրջափակել Լաչինի միջանցքը և չթողնեին, որ, այսպես կոչված, ադրբեջանցի բնապահպան ցուցարարներին միանան նաև ադրբեջանական հատուկ նշանակության ջոկատների զինվորներ, «գորշ գայլեր» կազմակերպության որոշ անդամներ կամ համակիրներ և հարցը դրանով ավելի չբարդանար: Հարցը կա, ռուս խաղաղապահները թերացել են, չեն կարողացել ապահովել միջանցքի անխափան երթևեկությունը: «Փաստինֆո»-ի եթերում նման գնահատականով է հանդես եկել միջազգայնագետ Գրիգոր Բալասանյանը:

«Հայաստանը պետք է կորշտացնի իր դիրքորոշումն այս հարցում, գործուն քայլեր իրականացնի, այդ թվում՝ սպառնալիքների տեսքով` Լաչինի միջանցքի բացման ուղղությամբ, որ միջազգային հանրությունը հասկանա, որ Հայաստանը բավականին լուրջ է տրամադրված և այս ամենը կարող է վերաճել տարածաշրջանային պատերազմի »,- նշեց Բալասանյանը:

Նրա արձանագրմամբ` այսօր ՀՀ զինված ուժերը դեռևս այն վիճակում չեն գտնվում, որ հնարավոր լինի տարածաշրջանային մեծ պատերազմ վարել, ինչը հասկանալի է, քանի որ 44-օրյա պատերազմից հետո մեծ կորուստներ ենք կրել, բայց դա չի նշանակում, որ մենք որպես ազգ, որպես պետություն պետք է թույլ տանք, որ մեր հայրենակիցները հայտնվեն վտանգի առաջ և հումանիտար աղետի առջև:

Բալասանյանը ճիշտ քայլ համարեց այն, որ Հայաստանը հրաժարվել է մասնակցել Մոսկվայում դեկտեմբերի 21-ին կայացած եռակողմ հանդիպմանը, որը, սակայն կայացավ երկկողմ՝ Ադրբեջանի և ՌԴ ԱԳ նախարարների միջև: Բալասանյանը գտնում է, որ Հայաստանը հետայսու պետք է հրաժարվի նաև այլ ֆորմատով բանակցություններից Ադրբեջանի հետ, կեցվածք ցույց տա և հայտարարի, որ քանի դեռ հարցը չի կարգավորվել. Հայաստանը բանակցային սեղանի շուրջ չի վերադառնալու, բայց միևնույն ժամանակ Հայաստանը պետք է դաշնակից պետությունների միջոցով քայլեր ձեռնարկի՝ միջանցքի ապաշրջափակման հարցով: Միջազգայնագետը նաև արձանագրեց, որ ակնհայտ է՝ միջազգային հանրությունը և աշխարհը փոխվում է, փետրվարի 22-ից հետո նոր աշխարհակարգի ենք ականատես լինելու:

Մանրամասները` տեսանյութում:

Աղբյուր` Փաստինֆո