Փաստ ինֆո

Լաչինի միջանցքում ստեղծված իրավիճակը առաջին հերթին քաղաքական և անվտանգային խնդիր է։ Այս մասին խորհրդարանում լրագրողների հետ զրույցում հայտարարել է «Պատիվ ունեմ» խմբակցության քարտուղար Տիգրան Աբրահամյանը:

Ըստ պատգամավորի՝ եթե նույնիսկ միջանցքում անխափան երթևեկությունը վերականգնվի, դրանով իրավիճակը չի հանգուցալուծվելու.

« Ցանկացած իրավիճակի պատասխանատվությունը իշխանություններինն է, անկախ նրանից՝ ով է այդ պահին իշխանության՝ Նիկոլը, թե Պողոսը, բայց եթե հաշվի ենք առնում օրվա իշխանությունների քաղաքական տապալման հետևանքները, որը երկիրը հասցրել է ողբերգական վիճակի, բնական է, որ իշխանությունը թիվ մեկ պատասխանատուի կարգավիճակ ունի»,-ասաց Աբրահամյանը։

Նրա համոզմամբ՝ այն, ինչ այսօր տեղի է ունենում Արցախում, կարող է տեղի ունենալ ՀՀ ցանկացած մարզում.

« Այդ ժամանակ էլ կասեն Ռուսաստանը չիրականացրեց իր պարտականությունը, ինչ անի խեղճ իշխանությունը։ Արցախում ապրում են մեր հայրենակիցները և ՀՀ իշխանությունները չեն կարող սահմանափակվել ինչ-որ նամակներով և պատասխանատվությունը բարդել միջազգային դերակատարների վրա»,- ասաց Աբրահամյանը։

Պատգամավորը հայտարարեց նաև՝ եթե Արցախի շրջափակումը շարունակվի ևս մեկ շաբաթ, բերելու է ծայրահեղ իրավիճակի։

Աղբյուր` Փաստինֆո