Փաստ ինֆո

Արցախում իրավիճակն ընդհանուր առմամբ նույնն է․ հումանիտար բեռ ընդհանրապես չի մտել Արցախ՝  շրջափակման առաջին օրվանից առայսօր։ Այդուհանդերձ, Արցախի ժողովուրդը դիմակայում է ու պատրաստ  է պայքարի՝ միայն թե որոշակի անորոշություն կա, թե պետությունը՝ ի դեմս իշխանության, ինչ ճանապարհով է հասնելու իրավիճակի հանգուցալուծմանը։ Այդ մասին «Փաստինֆո»-ի հետ զրույցում ասաց Արցախի ԱԺ «Արդարություն» խմբակցության ղեկավար Դավիթ Գալստյան։

«Հասարակության տրամադրությունները, մեծ հաշվով, չեն տարբերվում 1988թ․ եղած տրամադրություններից։ Խնդիրն այն է, որ եթե այն ժամանակ մենք զգում էինք ՀՀ իշխանությունների և ժողովրդի լիակատար աջակցությունը, ապա հիմա, ցավոք, չենք զգում։ Արցախյան շարժման սկզբնավորման հենց սկզբից մենք միասնական էին պայքարում, սերտ համագործակցություն կար, իսկ հիմա ՀՀ իշխանություններն իմիջիայլոց են վերաբերվում Արցախին ու արցախահայությանը։ Հայտարարություններն ու քայլերը, որոնք այս ընթացքում կատարեցին ու հնչեցրին ՀՀ իշխանությունները, շատ թույլ էին»,-ասում է Գալստյանն ու հիշեցնում, որ ի տարբերություն 1988-ի, այսօր ՀՀ-ն միաջզգայնորեն ճանաչված պետություն է և ունի բոլոր լծակները՝ Արցախում ստեղծված ճգնաժամային իրավիճակի մասին միջազգային բոլոր հարթակներում բարձրաձայնելու և Արցախի ապաշրջափակմանն օր առաջ հասնելու համար։

Պատգամավորի գնահատմամբ՝ դիվանագիտական խողովակներով բավարար աշխատանք չտանելուց զատ, ՀՀ իշխանությունները փորձում են եմղավորներ փնտրել այլ կողմերում, մասնավորապես խաղաղապահ առաքելություն իրականացնող կողմում։ Հիշելով հայտնի ժողովրդական ասացվածքը՝ «Երբ երեխան չի լացում, մայրը կուրծք չի տալիս»՝ Գալստյանը նկատում է՝ մինչև մենք՝ հայկական կողմը պահանջատեր չլինի, որևէ մեկը շահագրգռված չի լինելու մեր իրավունքների պաշտպանությամբ։

Հայաստանի իշխանություններն ամեն ինչ անում են, որ հասարակության մոտ ևս տպավորություն ստեղծվի, թե իրավիճակից դուրս գալու հարցում իրենք՝ իշխանությունները որևէ անելիք չունեն, խնդիրն իրենց հետ ու իրենց մեջ չէ, մինչդեռ, կրկնում եմ,  մինչև պահանջատեր չես լինում, տեր չես կանգնում քո իրավունքներին, հետդ ոչ ոք հաշվի չի նստում՝ առավելևս, եթե գործ ունես Ադրրբեջանի պես երկրի հետ։ Հասարակության թույլ արձագանքն այս ամենին, իմ համոզմամբ, պայմանավորված է հենց սլաքներն ուրիշի վրա ուղղելու՝ ՀՀ իշխանությունների գործելաոճով»,-ասում է Գալստյանը։

Արցախի իշխանությունների թերացումներից մեկը, ըստ մեր զրուցակցի, այն է, որ վերջիններս բավարար չափով կոշտ ու հստակ պահանջներ չեն դնում հայաստանյան գործը նկերների առաջ՝ որպես Արցախի անունից բանակցած ու եռակողմ համաձայնագրի տակ ստորագրած կողմ։

Դրմբոնի և Կաշենի հանքերին ապօրինաբար տիրանալու Ադրբեջանի նկրտումների հարցը, ըստ Գալստյանի, պետք է բացառապես եռակողմ համաձայնագրի համատեքստում դիտարկվի ու որևէ պարագայում հարցին տնտեսական կամ այլ երանգ չտրվի։

«Առանցքային է, որ հանքերի թեմային վերաբերող  քննարկումներում տնտեսական կողմը  ընդհանրապես չքննարկվի․ դա  պետք է դիտարկվի միայն որպես եռակողմ համաձայնագրի համապատասխան դրույթի կոպտագույն խախտում և հարցը պետք է լուծվի այդ տիրույթում։ Եթե փորձ արվի այլ դաշտ բերել, ապա մեզ համար շատ վտանգավոր կարող է լինել»,-եզրափակեց Արցախի ԱԺ պատգամավորը։

Աղբյուր` Փաստինֆո