Փաստ ինֆո

Արցախն արտաքին աշխարհին կապող միակ ճանապարհի փակման առնչությամբ միջազգային արձագանքը կարելի է մասնակի կամ ամբողջությամբ դրական գնահատել, բայց, ընդհանուր առմամբ արդյունքը բացասական է։ Այդ մասին այսօր լրագրողների հետ ճեպազրույցում ասել է Արցախի պետնախարարի խորհրդական Արտակ Բեգլարյանը, ով մեկ շաբաթ է՝ նստացույց է անում ՄԱԿ-ի հայաստանյան գրասենյակի առաջ։
«Անկախ նրանից, թե ինչ է ասվում կամ հայտարարվում, ակնհայտ է, որ դա չի ազդում Ադրբեջանի վարքի վրա: Եվ Ադրբեջանն արդեն 8-րդ օրն է՝ շարունակում է Արցախի ժողովրդի ամբողջական շրջափակումը, կոլեկտիվ պատանդառությունը: Այդ տեսանկյունից միջազգային հանրության գործողությունները գնահատում եմ բացասական»,-ասաց Բեգլարյանը։

Արցախի պետնախարարը հիշեցրեց, որ ՄԻԵԴ-ի բարձրացրած հարցերին պատասխան տալու վերջին օրն է այսօր և Ադրբեջանը պետք է պաատսխան տա։ Սակայն, թե ինչ ժամանակահատվածում ՄԻԵԴ-ը կքննարկի փաթեթն ու երբ միջանկյալ որոշում կհրապարակի, Բեգլարյանը դժվարացավ ասել:

«Մենք ակնկալում ենք, պահանջում ենք, ՀՀ ԱԳՆ-ն էլ ջանքեր է գործադրում այդ ուղղությամբ, որ ՄԱԿ-ի անվտանգության խորհրդում հրատապ կարգով, բաց ձևաչափով մանրամասն այս հարցը քննարկվի, որպեսզի ՄԱԿ ԱԽ-ն էլ, Խորհրդի անդամներն էլ հստակ դիրքորոշումներ հայտնեն: Սա կարևոր ձևաչափերից մեկն է, որով հնարավոր կլինի բարձր մակարդակի միջազգային ճնշում գործադրել Ադրբեջանի վրա»,-ասաց Բեգլարյանը:
Արցախի պետնախարարի խորհրդականը ևս մեկ անգամ համոզմունք հայտնեց, որ առանց հստակ պատասխանատվության միջոցների, պատժամիջոցների, ալիևյան ռեժիմը խելքը գլուխը չի հավաքելու և այդ անպատժելիությունը նոր հանցագործություններ է ծնելու։

«Ցավալի է, որ երբ անհրաժեշտ են պատժամիջոցներ, դեկտեմբերի 17-ին Բուխարեստում Ալիևի հետ ստորագրվում է էներգետիկ՝ էլեկտրամատակարարման համաձայնագիր, որին ներկա է լինում նաև Եվրահանձնաժողովի նախագահը»,-նշեց նա։

Բեգլարյանը նաև ասաց, որ ճանապարհը բացելու համար Ադրբեջանը նախապայմաններ է առաջ քաշել։

«Իրենք ինչ-որ բան ակնկալում, պահանջում են, որ փակ են պահում: Թե՛ առերևույթ, թե՛ խորքային առումով իրենք հստակ նպատակներ ունեն: Ռուսական կողմն այդ ուղղությամբ աշխատում է, միջնորդություն կա, որոշակի բանակցային գործընթաց կա»,-ասաց ԱՐցախի պետնախարարի խորհրդականը։

Հիշեցնենք, որ Միջազգային իրավական հարցերով ՀՀ ներկայացուցչի գրասենյակը դիմել է Մարդու իրավունքների եվրոպական դատարան՝պահանջելով կիրառել միջանկյալ միջոցներ Ադրբեջանի նկատմամբ և պարտավորեցնել վերջինիս ապաշրջափակել Բերձորի (Լաչինի) միջանցքը: ՄԻԵԴ-ը Ադրբեջանին մինչև դեկտեմբերի 19-ը ժամանակ էր տվել՝ Հայաստանի ներկայացրած պահանջին պատասխանելու համար:

Աղբյուր` Փաստինֆո