Փաստ ինֆո

Տղերքի մեծ մասը ողջ կմնար, եթե հրամանատարները կազմակերպված լինեին: Իշխան Վահանյանի գործով դատական նիստին վկա Վարուժան Մարգարյանը պատմեց, որ որևէ գործողություն չի իրականացվել հրամանատարության կողմից՝ դիրքավորման, նահանջը կազմակերպելու, կորած զինծառայողներին գտնելու համար:

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Ջոն Հայրապետյանի նախագահությամբ, այսօր կայացել է մարտադաշտն ինքնակամ լքելու մեջ մեղադրվող հրամանատար Իշխան Վահանյանի գործով դատական նիստը:

Վարուժան Մարգարյանը, որը նորակոչիկ լինելով մասնակցել է Արցախյան երրորդ՝ 44-օրյա պատերազմին՝ Իշխան Վահանյանի գումարտակի կազմում, վկայի կարգավիճակով հարցաքննության ժամանակ պատմեց, որ սեպտեմբերի 27-ի առավոտյան տագնապ է եղել, բոլորը գնացել են Չռիկներ, մոտ 8 օր այդտեղ են մնացել, հետո գնացել են Հադրութ, Խուռհատում իրավիճակը խառն էր, իր համար դեռ պարզ էլ չէր, թե ինչ է կատարվում, տղաներից մեկն ասել էր, որ Իշխան Վահանյանը հեռացել է:

«Ամբողջ գումարտակը խառը վիճակում էր, անգամ մարդ կար՝ շատ տարօրինակ: Երեք-չորս հոգով քայլում էինք, մեկը՝ տարօրինակ համազգեստով էր՝ ոչ հայկական էր, ոչ՝ թուրքական, երևի «ռազվեդչիկ» էր, հարցեր էր տալիս, թե քանի մարդ կա գումարտակում և այլն, հետո՝ էլ չենք տեսել: Կարող է մենամարտի ժամանակ թուրք «ռազվեդչիկը» մտած լինի մեր մեջ և ցանկանար տվյալներ հավաքել, էդպես էլ գնաց, իրեն ոչինչ չենք ասել, չենք տեսել»,- նշեց վկան՝ պատմելով, որ հետո վաշտում կապիտան Գրիգորյանը բոլորին, որոնք մնացել են, հավաքել ու ուղեկցել է Կարմիր շուկա և այլ վայրեր:

Խուռհատ սարից նահանջի ժամանակ վկան Վահանյանին չի տեսել: Ըստ Մարգարյանի՝ այդ իրավիճակում հնարավոր չէր, որ Իշխան Վահանյանը բեկորային վնասվածք ստանար, դրա համար պետք է գտնվեր լեռան վերևի հատվածում: Ավելին, վկան հայտարարեց, որ նոր է իմանում, որ Վահանյանը վիրավորում է ստացել, ինքը գիտեր, թե ուղղակի հեռացել է: Տուժող կողմի ներկայացուցիչ Գուրգեն Գրիգորյանը հետաքրքրվեց՝ արդյո՞ք Վահանյանը կամ Հայկազ Գրիգորյանը որևէ կերպ փորձել են կազմակերպել դիրքավորումը, հրաման տրվել է, թե ոչ, քարեր շարել՝ դիրքավորման համար, ինչին ի պատասխան վկան նշեց, որ նման կազմակերպվածություն չի եղել: Շարունակելով հարցադրումները՝ տուժողի ներկայացուցիչը հետաքրքրվեց՝հնարավոր էր արդյոք օգնել տղաներին դուրս գալ, եթե հրամանատարությունը կապի դուրս գային, գոնե երեք-հինգ հոգու կյանք փրկելու համար, վկան արձագանքեց՝ ոչ ոք կապ չի հաստատել:

Հիշեցնենք, որ Իշխան Վահանյանին մեղադրանք է առաջադրվել ՀՀ քրեական օրենսգրքի 356-րդ հոդվածի (հրամանը չկատարելը) 3-րդ մասով և 380-րդ հոդվածի (մարտադաշտն ինքնակամ լքելը կամ զենքով գործելուց հրաժարվելը) 1-ին մասով: Նրա նկատմամբ որպես խափանման միջոց էր ընտրվել կալանավորումը։

Ըստ ՔԿ-ի՝ Վահանյանը, Ադրբեջանի Հանրապետության կողմից Արցախի Հանրապետության դեմ սանձազերծված ագրեսիվ պատերազմի և 2020թ. սեպտեմբերի 27-ին հայտարարված ռազմական դրության ժամանակ զբաղեցնելով ԱՀ պաշտպանության բանակի զորամասերից մեկի ուսումնական գումարտակի հրամանատարի պաշտոնը, հանդիսանալով իր ենթակա անձնակազմի պետը, մարտական գործողությունների ընթացքում չի կատարել իր անմիջական պետի հրամանը, ինչպես նաև ինքնակամ լքել է մարտադաշտը, որի արդյունքում զորամասի ուսումնական գումարտակի անձնակազմից զոհվել, տարբեր աստիճանի մարմնական վնասվածքներ են ստացել և գերեվարվել պարտադիր ժամկետային զինծառայողներ՝ այդ կերպ առաջացնելով ծանր հետևանքներ: Նշենք, որ այս գործով անցնող միակ մեղադրյալը Իշխան Վահանյանն է։

Քրեական գործն ի սկզբանե մակագրվել էր Սյունիքի մարզի ընդհանուր իրավասության դատարանի դատավոր Լ․ Սեփխանյանին, սակայն հետագայում գործի ընդդատությունը փոխվել է՝ պայմանավորված միջադեպով։ Գործն այժմ Երևանի ընդհանուր իրավասության դատարանի դատավոր Ջոն Հայրապետյանի վարույթում է։

Հեղինակ՝ Իզաբել Սահակյան

Աղբյուր` Փաստինֆո