Փաստ ինֆո

Ակնհայտ է, որ Լաչինի միջանցքը փակած ադրբեջանցիները ոչ մի կապ չունեն բնապահպանության հետ, սա քաղաքական պրոցես է, որը կառավարվում է Բաքվի հատուկ ծառայությունների կողմից, շղարշն ուղղակի բնապահպանական է: Այսօր բնապահպաններ են, վաղը կարող են լինել առևտրականներ, հաջորդ օրը՝ բեռնատարների վարորդներ: «Փաստինֆո»-ի հետ զրույցում ասել է միջազգային հարցերով փորձագետ Սուրեն Սարգսյանը՝ անդրադառնալով Լաչինի միջանցքի փակմանը՝ հավելելով, որ որևէ երաշխիք չկա, որ միջադեպը չի կրկնվի և այս ամենը շարունակական չի լինի:

Նշենք, որ այսօր արդեն 5-րդ օրն է՝ Արցախը գտնվում է շրջափակման մեջ: Ադրբեջանցի կեղծ «բնապահպանների» խումբը փակել է Արցախը Հայաստանին կապող Լաչինի միջանցքը:

Թեև Արցախի պետնախարար Ռուբեն Վարդանյանն հայտարարել էր, որ, ամենայն հավանականությամբ, միջանցքը կբացվի, սակայն մինչ այս պահը այն դեռևս շարունակում է փակ մնալ:

Սուրեն Սարգսյանը նշում է՝ պետք է հասկանալ, թե միջանցքը բացելու դիմաց հայկական կողմն ի՞նչ զիջումների է պատրաստվում գնալ

«Շատ հարցեր կան, որոնց պատասխանները դեռ չունենք: Ինձ թվում է՝ որևէ մեկը չի կարծում, թե մեր սիրուն աչքերի համար ադրբեջանցիները կբացեն ճանապարհը: Ակնհայտ է, որ դրա դիմաց ինչ-որ բան պետք է ստանան, այս ակցիան հստակ նպատակ ուներ՝ Հայաստանից ինչ-որ բան ստանալ կամ ճնշում գործադրել՝ իջումների գնալու համար»,-ասաց Սուրեն Սարգսյանը;

Փորձագետի գնահատմամբ՝ միջազգային հանրության արձագանքը Արցախում ստեղծված հումանիտար ճգնաժամին շատ թույլլ էր, ավելի հզոր կարող էր լինել.

«Ամենաբարձր մակարդակներով արձագանքներ գրեթե չեղան, եղան արձագանքներ տարբեր պետությունների արտաքին գերատեսչությունների հանրային կապերի պատասխանատուների մակարդակով, բայց ավելի բարձր մակարդակի հայտարարություններ չեղան, տարբեր երկրների օրենսդիրներ հայտարարություններ արեցին, բայց արձագանքը շատ ավելի մեղմ էր, թույլ էր, քան կարելի էր ակնկալել»,-ասաց Սուրեն Սարգսյանը:

Ինչ վերաբերում է ռուսական կողմի, մասնավորապես՝ ռուս խաղաղապահների արձագանքին՝ Սուրեն Սարգսյանը նշում է՝ ռուսական կողմը շատ լավ հասկանում է, որ Ադրբեջանի այս քայլն առաջի հերթին ուղղված է հենց ռուս խաղաղապահներին և Արցախում ռուսական կողմի ներկայությանը.

«Սա արժանի պատասխանի կարժանանա ռուսական իշխանությունների կողմից, ես, կարծում եմ, որ եթե ոչ այսօր, ապա որոշ ժամանակ հետո Ռուսաստանի իշխանությունները Ադրբեջանի և Թուրքիայի սադրանքներին արձագանքելու են, բայց այս պահին Ռուսաստանի դիրքերը միջազգային գործընթացներում շատ վատ են՝ հաշվի առնելով նաև ուկրաինական պատերազմը»,-ասաց նա:

Մեր հարցին՝ ռուս խաղապահներն արդյո՞ք կիրառում են անհրաժեշտ բոլոր գործիքակազմը՝ ճանապարհը բացելու համար, արդյո՞ք խաղաղապահներն ուժ կիրառելու մանդատ ունեն՝ Սուրեն Սարգսյանն ասաց՝ ինքնապաշտպանությունից զատ՝ ուժի կիրառման խնդիր չի կարող լինել, քանի որ խաղաղապահ առաքելության գործառույթները հստակ սահմանված են միջազգային փաստաթղթերով.

«Պետք չէ ակնկալել, որ ռուս խաղապահները պետք է գործողություներ անեն Արցախում:

Խաղաղապահ առաքելությունը սովորաբար շատ հստակ մանդատ է ունենում, հստակ պայմանավորվածություն է լինում՝ ի՞նչ գործողություններ կարող են անել, ի՞նչ չեն կարող անել: Եթե իրենք միջազգային կազմակերպության մանդատի ներքո գտնվող խաղաղապահներ չեն, ապա ենթարկվում են համընդհանուր իրավական նորմերին, որոնք վերաբերում են խաղաղապահ առաքելություններին: Եթե ռուս խաղաղապահների մանդատն ամրագրված չէ նոյեմբերի 9-ի համաձայնագրով կամ երկկողմ այլ փաստաթղթերով, ապա միջազգային իրավունքի նորմերը տարածվում են նաև նրանց վրա »,-ասաց Սարգսյանը:

Աղբյուր` Փաստինֆո