Փաստ ինֆո

Երևանի ընդհանուր իրավասության դատարանում՝ դատավոր Վահե Միսակյանի նախագահությամբ, այսօր կայացել է ՀՀ երրորդ նախագահ Սերժ Սարգսյանի և մյուսների գործով դատական նիստը, որի ընթացքում շարունակվեց գործով առանցքային վկայի՝ Սևակ Քոչարյանի հարցաքննությունը։

Ինչպես արդեն տեղեկացրել ենք՝ նշված վկայի հարցաքննությունը բավական բարդ է ընթացել, քանի որ վկան կա՛մ չէր ներկայանում նիստերին, կա՛մ ներկայանալու դեպքում էլ, պատճառաբանելով լսղական խնդիրներ, չէր լսում։ Ի վերջո, նախորդ դատական նիստին հաջողվեց ավարտել Սևակ Քոչարյանի հարցաքննությունը։ Սակայն դատարանում նրա ցուցմունքն էական հակասում և տարբերվում էր նախաքննական ցուցմունքից։

Դատարանն այսօր հրապարակեց վկայի նախաքննական ցուցմունքը, իսկ մինչ այդ Սերժ Սարգսյանի պաշտպան Արմամ Մակինյանը առարկեց վկայի հարցաքննության ընթացքում պաշտպանության կողմի տրված հարցերը մասամբ հանելու դեմ՝ առաջարկելով վկային լսել այնպես, ինչպես՝ նախաքննության ընթացքում քննիչի կողմից էին տրվում։ Նշենք, որ վկային տրվող հարցերի մի մասը նշված վարույթի հետ կապ չունեն, ըստ այդմ, որոշակի սահմանափակումներ էին մտցվել՝ նշված հարցերի առնչությամբ, դատարանը դրանք հանել էր՝ թույլատրելով վկային չպատասխանել դրանց, իսկ պաշտպանության կողմի պնդմամբ՝ այդ հարցերով ցանկանում են ի ցույց դնել, թե ինչ գործընթացներ են ուղեկցել գործին, վկան ինչ նյութական և բիզնես խնդիրներ է ունեցել, որոնք լուծել է։

Նախագահողը չբացառեց, որ համապատասխան փաստաթղթեր ներկայացնելու դեպքում թույլատրի պաշտպանության կողմին բարձրաձայնել հարցերը, սակայն, մարտավարությունից ելնելով, պաշտպանության կողմը չցանկացավ նախապես որոշ հանգամանքներ ներկայացնել։

Դատարանը հրապարակեց վկայի նախաքննական ցուցմունքները, որոնց համաձայն՝ վկան 2013 թվականին տեղեկացել էր Գյուղնախարարության հայտարարած մրցույթի՝ 27 միլիոն տոննա վառելիքի ներմուծման մասին եւ որոշել էր «Սովրանո» ընկերության միջոցով մասնակցել։ Նա տեղյակ եղել է, որ մրցույթին մասնակցել են երեք ընկերություններ՝ «Սովրանո» ընկերությունը՝ 1 լիտրի դիմաց 425 դրամ առաջարկով, «Մաքս գրուպ» ընկերությունը՝ 420 դրամ, եւ «Ֆլեշ» ընկերությունը՝ 440 դրամ: Հաղթող էր ճանաչվել «Մաքս գրուպ» ընկերությունը, հետագայում, սակայն, ընկերությունը հրաժարվել էր մատակարարումից։ Առաջարկը պետք է փոխանցվեր «Սովրանո» ընկերությանը, սակայն, գյուղնախարարությունից ընկերության հետ կապ չեն հաստատել եւ վառելիքը ձեռք են բերել 440 դրամով՝ «Ֆլեշ» ընկերությունից:

«Մրցույթի օրը, 17։30-ի սահմաններում, ինձ է զանգահարում «Ֆլեշ» ընկերության տնօրեն Յաշա Խաչատրյանը եւ ասում՝ ՊՆ-ից պրծար, հիմա էլ գյուղատնտեսությանն ես անցել։ Ես հասկացա, որ մրցույթի կանոնները խախտվել են, որովհետեւ մրցույթի արդյունքները պետք է հրապարակվեին ժամը 18.00-ին, սակայն, 17.30-ին Յաշան արդեն գիտեր, որ ես էլ եմ մասնակցել մրցույթին»,- նշել էր նա՝ նախաքննական ցուցմունքում։

Նշված վկայի և նախկին գյուղնախարար, հանգուցյալ Սերգե Կարապետյանի հետ նախաքննության ընթացքում առերես հարցաքննություն է տեղի ունեցել, որի ժամանակ Սևակ Քոչարյանը նշել է, որ ճանաչում է Կարապետյանին, նախկինում նրա հետ հանդիպել է՝ 2013թ. հունվարին, իր աշխատասենյակում և քննարկել են նախարարության հայտարարած դիզվառելիքի ներմուծման ծրագրի մասին, իսկ Սերգո Կարապետյանն ասել է, որ առաջին անգամ է տեսնում Սևակ Քոչարյանին, նրան չի ճանաչում, երբևէ չի հանդիպել։

Նկատի ունենալով վկա Սևակ Քոչարյանի լսողական խնդիրները՝ նրա փաստաբանը միջնորդեց հետաձգել դատական նիստը և տրամադրել նախաքննական ցուցմունքի պատճենները, որպեսզի վկան կարողանա ծանոթանալ և վերհիշել ցուցմունքը, ուստի, խնդրում են հետաձգել դատական նիստը։

Հաջորդ դատական նիստը նշանակվել է հունվարի 12-ին, ժամը՝ 14.00-ին։ Ըստ ամենայնի վկան լրացուցիչ կհարցաքննվի՝ նախաքննական ու դատաքննական ցուցմունքների միջեւ առկա հակասությունների շուրջ։

Հիշեցնենք, որ քրեական գործով կա 3 մեղադրյալ։ Սերժ Սարգսյանից բացի մեղադրանքներ են առաջադրվել նաեւ փոխնախարար Սամվել Գալստյանին, գործարար Բարսեղ Բեգլարյանին։ Ըստ մեղադրական եզրակացության՝ ՀՀ երրորդ նախագահ Սերժ Սարգսյանի կազմակերպմամբ և Ֆլեշ ՍՊ ընկերության սեփականատեր Բարսեղ Բեգլարյանի դրդմամբ, ՀՀ նախկին գյուղատնտեսության նախարարի տեղակալ Սամվել Գալստյանի ու նույն նախարարության բուսաբուծության վարչության պետ Գևորգ Հարությունյանի օժանդակությամբ, ՀՀ նախկին գյուղատնտեսության նախարար Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամը:

Հեղինակ՝ Իզաբել Սահակյան

Աղբյուր` Փաստինֆո