Փաստ ինֆո

Ադրբեջանը փակել է Լաչինի միջանցքը, որպեսզի փորձի նույն կարգավիճակով միջանցք վերցնել Սյունիքով, որն Ադրբեջանը կկապի Նախիջևանի հետ: Իրենք կասեն՝ եթե ուզում եք Արցախը կապվի Հայաստանի հետ, մենք էլ պետք է Սյունիքով Նախիջևանին կապվող միջանցք ունենանք:Համոզված եմ, որ սա է ուզում Ադրբեջանը:

«Փաստինֆո»-ի հետ զրույցում հայտարարել է «Արաբո» ջոկատի հրամանատար, ազատամարտիկ Մանվել Եղիազարյանը՝ անդրադառնալով Ադրբեջանի կողմից Լաչինի միջանցքը փակելուն:

Ինչ վերաբերում է Արցախի ապաշրջափակման մասով Հայաստանի հասարակության և իշխանությունների արձագանքին՝ Մանվել Եղիազարյանն ասում է.

«Միայն անասունն է, որ իր ձագին աչքի առաջ մորթում են, մեկ անգամ բառաչում է, հետո գլուխ թեքում ու գնում արածելու: Հիմա մենք այս վիճակին ենք հասել:

Իշխանությունն անընդհատ աղմկում էր, որ մինչև տարեվերջ պետք է «խաղաղության պայմանագիր» ստորագրենք, արդյունքն էլ սա պետք է լինի: Եթե ուզում ես պաշտպանես քոնը, պետք է տաս ուրիշին, հիմա մենք չենք ուզում մեր հայրենիքը պաշտպանել, պետք տանք ուրիշին: Մենք չկարողացանք այնպիսի հասարակություն պատրաստել, որը կարող է իր պատիվը պաշտպանել, արդյունքում ունեցանք սա»,-ասաց նա:

«Արաբո» ջոկատի հրամանատարը հիշեցնում է, որ Արցախյան առաջին պատերազմի ժամանակ այս իրավիճակը չէր՝ Հայաստանը և Արցախը ավելի միասնական էին, Մայր Հայաստանը թև ու թիկունք էր Արցախին.

«Արցախյան առաջին պատերազմի ժամանակ իշխանություններ գոյություն չունեին, շատ թույլ էին, չէին կարողանում անմիջականորեն ազդել մեզ վրա, մենք ավելի ուժեղ էինք, մարդիկ ավելի հայրենասեր էին, հայրենիքը հանձնողին կպատժեին, դրա համար էլ այն իշխանությունները չկարողացան այս ամենն անել, բայց այս իշխանությունները կարողացան, մի խոսքով՝ հիմա աննորմալ վիճակ է»,-ասաց ազատարամտիկը:

Ինչպես հայտնել էինք՝ ադրբեջանցիների կեղծ «բնապահպանների» խումբը արդեն երրոդ օրն է՝ փակել է Արցախը Հայաստանին կապող միակ մայրուղին՝ Լաչինի միջանցքը, ինչի հետևանքով շուրջ 120.00 բնակիչ հայտնվել է շրջափակման մեջ: Արցախի բնակավայրերում հումանիտար և պարենային ճգնաժամ է առաջացել, քանի որ հնարավոր չէ այնտեղ սնունդ, դեղորայք և առաջին անհրաժեշտության պարագաներ հաացնել: Ավելին, դեկտեմբերի 13-ից Ադրբեջանը դադարեցրել է նաեւ Արցախի գազամատակարարումը։

Աղբյուր` Փաստինֆո