Փաստ ինֆո

Հումանիտար աղետ ստեղծելու ճանապարհով արցախահայությանը վհատեցնելու Ադրբեջանի հաշվարկները չեն աշխատում։ Սահմանամերձ Թաղավարդում ու Խրամորթում խուճապի նույնիսկ նշույլ չկա։

«Մեզ համար այս ամենը նորություն չէր։ Սպասում էինք, որ ադրբեջանցիներն էլի կփորձեն կոտրել մեզ, բայց սխալվում են։ Ճանապարհի փակ լինելը, բնականաբար, մտահոգություններ է առաջացնում, բայց մարդիկ իրենց առօրյա հոգսերով են զբաղված։ Անգամ որոշները մտածում են՝ հավաքվեն, գնան ճանապարհը բացել տան, ուղղակի, հասկանալի պատճառով դեռ որ սպասում են»,-Փաստինֆո-ի հետ զրույցում ասում է սահմանամերձ Թաղավարդի բնակիչ Ռուդիկ Բադասյանը։

Թաղավարդցիները ձմեռվա վառելափայտի հոգսը ժամանակին հոգացել էին։ Վերջին ավելի քան երկու տարում, թշնամու քթի տակ ապրելով ու գրեթե ամեն օր առերեսվելով ադրբեջանական սադրանքներին, նման զարգացման սպասում էին։

«Սովորել ենք արդեն, անգամ հիմա նստած կատակում ենք, հումորային զրույցներ անում։ Ի՞նչ անենք բա, պիտի դիմակայենք՝ ոնց կարող ենք»,-ասում է Բադասյանը։
Արցախահայությունը ճգնաժամային պայմաններում ապրելու մեծ փորձ ունի։ Բադասյանը նկատում է՝ ադրբեջանցիների այս քայլերի քաղաքական ենթատեքստը բոլորն են հասկանում, բայց կարևոր է, որ իշխանությունները չընկրկեն թշնամու ճնշումների առաջ։

Նույն միտքն ընդգծում է նաև Խրամորթի գյուղապետը։ Սահմանամերձ այս համայնքում ևս կա հստակ գիտակցում՝ թշնամին ճնշումներով փորձում է նոր զիջումներ ստանալ։

Ադրբեջանի նման սադրանքները նորություն չեն եմզ համար, ու գիտենք նաև, թե ինչի համար են անում այս ամենը։ Մենք, ուղղակի, տոկուն ու համբերատար պետք է լինենք։ Եթե ուզում ենք մեր ոհղի վրա շարունակել ապրել, պիտի դիմադրենք, այլ տարբերակ, ուղղակի, ներկա դրությամբ չեմ տեսնում։ Թշնամու շանտաժին կուլ գնալ չի կարելի։ Շրջափակամն մեջ ենք, հասկանալի է, որ դժվարություններ շատ են լինելու, այդուհանդերձ, կոտրվելու ու ընկրկելու իրավունք չունենք»,-ասում է Խարմորթի գյուղապետ Զորիկ Աբրահամյանը։

Արցախյան առաջին պատերազմի ամեն մի օրն անցած Աբրահամյանը հիշեցնում է՝ սրանից ավելի վատ օրեր են եղել, ուստի հիմա էլ լիահույս է, որ այս փորձությունն էլ կանցնեն պատվով։
«1990-ականներին, երբ մեր գյուղի տներն ադրբեջանցիները վառեցին, գնալու տեղ չունեինք. հարևան գյուղերում ենք ապաստանել։ Հիմա, փառք Աստծո, մեր տներում ենք։ Դժվարություններին կդիմանանք։ Կարևորը՝ գյուղացիների մոտ ընդհանրապես չկա խուճապ։ Մտահոգ են, ճիշտ է, քանի որ ալյուրի, բենզինի, գազի պաշարները սուղ են, բայց հուսանք՝ ճանապարհը երկար ժամանակ փակ չի մնա»,-ասում է գոյւղապետն ու շեշտում՝ կարևորը՝ չվհատվենք ու միասնական լինենք։

Արդեն ավելի քան 52 ժամ է՝ 120 հազար արցախահայությունն ամբողջությամբ շրջափակման մեջ է՝ կտրված արտաքին աշխարհից. երեկվանից ադրբեջանցիները փակել են նաև ՀՀ-ից Արցախ մտնող գազատարը։ Այդուհանդերձ, արցախցիները չեն ընկրկում. համոզված են՝ սա էլ կանցնի։

Աղբյուր` Փաստինֆո