Փաստ ինֆո

Երրորդ օրն է և միջազգային կազմակերպությունը, որը մարդու իրավունքների և աշխարհում խաղաղության համար է ստեղծվել, որևէ արձագանք, որևէ գնահատականի չի արժանացրել։ Գիտեմ, որ տեղյակ են, որովհետև գիտեք, որ «Ընդդեմ Ցեղասպանության հանցագործության» ֆորումի շրջանակներում նաև ՄԱԿ-ի պաշտոնյաներ են ներկա եղել և ես անձամբ եմ նրանց տեղեկացրել, թե ինչպիսի վիճակում է գտնվում Արցախը և այս ամենից հետո որևէ արձագանք չստանալը ՄԱԿ-ից՝ ցավալի է։ Կարծում եմ՝ իրենք իրենց սխալն առաջիկայում կուղղեն։ Այս մասին լրագրողների հետ զրույցում ասաց Արցախի ՄԻՊ Գեղամ Ստեփանյանը։

ՄԻՊ-ի դիտարկմամբ՝ ինքը սպասում է ոչ թե կոչեր, այլ՝ կոնկրետ գործողություններ իրականացվեն։ Նրա խոսքով՝ Արցախի ժողովրդի կյանքի իրավունքի երաշխավորման համար ՄԱԿ-ը պետք էմիջազգային գործիքակազմ կիրառի՝ լինի դա միջազգային մանդատի տրամադրումը խաղաղապահներին, ՄԱԿ-ի գրասենյակի բացումը՝ Արցախում, ի վերջո, գոյություն ունի ԼՂ, որտեղ ապրում են մարդիկ և ունեն իրավունքներ, միջազգային հանրությունը պարտավոր է ապահովել իրավունքների իրացումը։

«Երբեմն ինձ էլ էր թվում, որ անընդհատ խոսելով մարդու իրավունքների խախտումների մասին՝ չեմ լսվում միջազգային տարբեր հարթակներում, բայց եվրոպական երկրներ կատարած այցերի ընթացքում՝ համոզվել եմ, որ տեղեկությունների տիրապետում են, իմ, մեր կազմած զեկույցները հասնում են նրանց, տեսնում են, ծանոթանում են, բայց գործողություններ չի ձեռնարկվում։ Ուղիղ հարց եմ տալիս՝ ինչու չեք գործողություններ ձեռնարկում և ստանում եմ պատասխան՝ «պետք է պահպանենք անկողմնակալություն»։ Դե պահպանեք այդ անկողմնակալությունը, մարդիկ այնտեղ սպանվում են»,- ասաց նա՝ արձանագրելով, որ իրավիճակի վրա աչք փակելն աբսուրդային է։

Աղբյուր` Փաստինֆո