Փաստ ինֆո

Յուրաքանչյուր բանական մարդ, կամ մարդ, ով ուղեղի վրա գոնե 2 ծալք ունի, սպասում էր այս օրվան՝ յուրաքանչյուր օր ու յուրաքանչյուր ժամ։ «Փաստինֆո»-ի հետ զրույցում ասաց քաղտեխնոլոգ Կարեն Քոչարյանը՝ անդրադառնալով Ադրբեջանի կողմից Լաչինի միջանցքը փակելու հարցին։

Նշենք, որ արդեն ավելի քան 53 ժամ է, ինչ Արցախը գտնվում է ադրբեջանական շրջափակման մեջ, իսկ երեկվանից զրկվել է նաեւ գազամատակարարումից։

Կարեն Քոչարյանը համոզված է, որ սա եզակի դեպք չէ, և առաջիկայում բացառված չեն այսօրինակ սադրանքների կրկնությունը ու այս առումով էլ չի բացառում, որ նման սադրանքները կարող են հանգեցնել նաև լոկալ ռազմական գործողությունների։ Ադրբեջանական սադրանքին հայկական պաշտոնական արձագանքը Կարեն Քոչարյանը բավարար չի համարում և այս առումով ասաց՝ «Ամեն ինչ արել են, որ այսօրվա վիճակին հասցնեն հենց իրենք՝ Հայաստանի իշխանություններն ու Արցախի նախագահ Արայիկ Հարությունյանը»։

Իսկ ռուս խաղաղապահների գործողությունները քաղտեխնոլոգը բնութագրում է շատ վատ. Եթե խաղաղապահ են, ասաց նա, ուժ կիրառելու իրավունք չունեն, բայց հարցը չի վերաբերում միայն ուժ կիրառելուն.

«Խաղաղապահը նրա համար չի, որ երբ փակեն ճանապարհն ու հումանիտար ճգնաժամ ստեղծեն, ասեն՝ դե մենք ուժ կիրառելու իրավունք չունենք, դրա համար պետք է դիտենք, թե ինչպես են երեխաները մրսում կամ սոված մնում։ Չեմ կարծում, թե խաղաղապահների միսիան դա է։ Ադրբեջանի այս վարքագծով նսեմացվում է ռուսների դերը, ու դա արդեն նաև ռուսների խնդիրն է։ Մեր խնդիրն է այնքանով, որ Արցախում մարդիկ կարող են բավականին լուրջ խնդիրներ ունենալ՝ սկսած հացից և վերջացրած գազով, հոսանքով և այլն, բայց դա նաև ռուսներիր միջազգային իմիջի և իրենց դիրքավորման խնդիրն է Հարավային Կովկասում։ Որովհետև եթե այսպես երկար շարունակվի, նրանք կկորցնեն իրենց ազդեցությունն ընդհանրապես Հարավային Կովկասում»,- նշեց Կարեն Քոչարյանը։

Մեր զրուցակիցն անդրադարձավ նաև ադրբեջանցի «բնապահպանների» սադրանքից անմիջապես առաջ ԵՄ կողմից Ադրբեջանին խոշոր ֆինանսավորման՝ 2 միլիարդ դոլար տրամադրելու հարցին և ընդգծեց, որ դա «ռեալ պոլիտիկ» է։
«Այն է, ինչ իրականում տեղի է ունենում, այլ ոչ թե ասում ես՝ մենք դեմոկրատիա ունենք, ուրեմն ուժեղ ենք։ Ուժեղ է նա, ով ուժեղ է դիվանագիտությամբ, ուժեղ է անվտանգությամբ, ուժեղ է բանակով և ուժեղ է ազդեցությամբ՝ այդ թվում նաև տնտեսական ազդեցությամբ։ Սա աշխարհի իրական քաղաքականությունն է ՝ շատ վաղուց։ Եվ հիմար ռոմանտիկները միշտ ապուշ վիճակում են հայտնվում, երբ հավատում են տարբեր ռոմանտիկ մտքերի։ Օրինակ՝ որ Ալիևը դիկտատոր է, իսկ ինքը դեմոկրատ, ուրեմն ինքը ուժեղ է։ Դա հիմարություն է»,- շեշտեց Կարեն Քոչարյանը։

Աղբյուր` Փաստինֆո