Փաստ ինֆո

Ադրբեջանի ֆաշիստական ռեժիմը շարունակում է հակահայկական և հակաարցախյան իր գործողությունների շարքը, որոնք միտված են հայաթափելու և շանտաժի ենթարկելու հայկական կողմին: Ադրբեջանի այս քայլը նաև հակառուսական և խաղաղապահների դեմ ուղղված գործողություն է: «Փաստինֆո»-ի հետ զրույցում Լաչինի միջանցքում ստեղծված իրավիճակն այսպես է գնահատել ԱԺ 7-րդ գումարման պատգամավոր Արման Աբովյանը:

Ինչպես հայտնի է՝ ադրբեջանցիների կեղծ «բնապահպանների» խումբը երեկվանից փակել է Արցախը Հայաստանին կապող միակ մայրուղին՝ Լաչինի միջանցքը, ինչի հետևանքով շուրջ 120.00 բնակիչ հայտնվել է շրջափակման մեջ: Արցախի բնակավայրերում հումանիտար և պարենային ճգնաժամ է առաջացել, քանի որ հնարավոր չէ այնտեղ սնունդ, դեղորայք և առաջին անհրաժեշտության պարագաներ հասցնել:

Արման Աբովյանը, անդրադառնալով ստեղծված իրավիճակին, նշում է՝ Ադրբեջանը հեռահար նպատակներ է հետապնդում, ըստ նրա՝ սա նոր ցեղասպանության, էթնիկ զտումների նախապատրաստական փուլն է.

«Ադրբեջանը նպատակ ունի հեռացնել միակ պատնեշը, որը գոյություն ունի վայրենիների թրքալեզու ցեղախմբի և արցախահայության միջև»,-հավելեց զրուցակիցը:

Աբովյանի դիտարկմամբ՝ Ադրբեջանի այս քայլը շանտաժի տարրեր է պարունակում, նա չի բացառում, որ Լաչինի միջանցքը բացելու համար ադրբեջանական կողմը նոր նախապայմաններ առաջ քաշի.

«Այս կամ այն ձևով խնդիրը կլուծվի, հարցն այն է, թե ինչ ենք մենք հերթական անգամ կորցնելու, ինչ պայմաններով է խնդիրը լուծվելու: Թող ոչ ոք չզարմանա, որ վաղը ադրբեջանցի պայմանական «էկոլոգները» սկսեն փակել արդեն Հայաստանի ճանապարհները, տեսնենք այս պարագայում իշխանություններն ինչ կասեն»,-ասաց նա:

Աբովյանը նաև հավելեց, որ ստեղծված իրավիճակում անադեկվատ է գնահատում Հայաստանի իշխանությունների արձագանքը.

«Ես չգիտեմ՝ իրենք ինչով են մտածում, բայց իրենց ամեն հայտարարությամբ ավելի բարդացնում են իրավիճակը»,-ասաց Աբովյանը:

Աղբյուր` Փաստինֆո