Փաստ ինֆո

Կոսովոյում և Մետոխիայում իրավիճակը կարող է վերաճել զինված հակամարտության մինչև նոր տարի, եթե եվրոպական կառույցներն ու ՄԱԿ-ը չսկսեն մոտ ժամանակներս լուծել այդ հարցը, ՌԻԱ Նովոստիին հայտարարել է Ռուսաստանի գիտությունների ակադեմիայի սլավոնագիտության ինստիտուտի Բալկանյան ժամանակակից ճգնաժամի ուսումնասիրման կենտրոնի ղեկավար Ելենա Գուսկովան։

Նախօրեին Սերբիայի նախագահ Ալեքսանդր Վուչիչը հայտնել էր, որ երկրի ղեկավարությունը պաշտոնական հարցում կուղարկի ՆԱՏՕ-ի KFOR առաքելության հրամանատարությանը Կոսովոյում եւ Մետոխիայում սերբական ոստիկանության եւ բանակի զորակազմի բաշխման վերաբերյալ:

Փորձագետը հիշեցրել է, որ սերբերի կարգավիճակը Կոսովոյում եւ Մետոխիայում ոչ մի կերպ որոշված չէ, իսկ Սերբիայի ղեկավարությունը նույնիսկ չի կարող մտնել այդ տարածք առանց Պրիշտինայի թույլտվության: ՄԱԿ ԱԽ 1244 բանաձևի համաձայն՝ սերբական ոստիկանությունը կարող է մտնել այնտեղ, սակայն այդ կետը ոչ ոք երբևէ չի կատարել։ Սերբական ղեկավարությունը երկար ժամանակ զիջումների էր գնում այն հույսով, որ ալբանացիներն, այնուամենայնիվ, անվտանգ կդարձնեն սերբերի կացությունը Կոսովոյում եւ Մետոխիայում, սակայն ալբանացիները մտադիր են ամեն ինչ անել, որպեսզի սերբերն ամբողջությամբ ձուլվեն կամ հեռանան, կարծում է Գուսկովան:

«Ուստի երեկ Վուչիչը հայտարարեց, որ հույս չունի, որ սերբական ոստիկանությանը թույլ կտան մտնել տարածք, բայց նա անհրաժեշտ է համարում օգտագործել այդ իրավունքը։ Ինձ թվում է, որ նման հայտեր պետք էր վաղուց անել, քանի որ Կոսովոյում եւ Մետոխիայում լարվածությունը մենք տեսնում ենք ավելի քան 10 տարի։ Այսօր իրավիճակն այնքան բարդ է, որ սերբական ղեկավարությանը այնպիսի իրավիճակի մեջ են դրել, որ նրանք միայն մեկ ելք ունեն՝ ճանաչել Կոսովոյի և Մետոխիայի անկախությունը։ Դա Բելգրադը ոչ մի կերպ չի կարող անել։ Եվ Անվտանգության խորհրդում այդ հարցը նույնպես չի կարող անցնել, քանի որ Ռուսաստանն աջակցում է Սերբիային», - կարծում է նա։

«Այդ պատճառով իրավիճակը թեժանալու է, հիմա չափազանց կարեւոր է թույլ չտալ զինված ընդհարում. եւ սերբական բանակն է պատրաստ, եւ ՆԱՏՕ-ի այն անդամները, որոնք Կոսովոյի ներսում են, թեեւ նրանք չեն միջամտում իրավիճակին: Բայց այն, որ ալբանական ոստիկանությունն արդեն այս տարիների ընթացքում ամրապնդվել է և փաստացի վերածվել բանակի, նույնպես չպետք է մոռանանք։ Դա նույնպես կարող է լրջորեն սրել իրավիճակը և բերել բախումների։

Խնդիրը պետք է լուծել Կոսովոյի սերբական բնակչությանը իրավունքների տրամադրման մակարդակով։ Դա կարող են անել Եվրամիությունը եւ ՄԱԿ-ը», - ասաց փորձագետը։

Աղբյուր` Փաստինֆո