Փաստ ինֆո

Պատերազմը չի ավարտվել ու շատ կարևոր է, որ այստեղ ապրողներս գիտակցենք դա ու հասկանանք, որ խաղաղություն չի լինելու, անընդհատ պայքարի մեջ ենք լինելու։ Պետք է նաև հաշվի առնենք, որ դժվար ձմեռ ենք ունենալու ու պատրաստ լինենք դրան։ «Փաստինֆո»-ի հաղորդմամբ՝ այդ մասին Արցախի հանրային հեռուստատեսությանը տված հարցազրույցում ասել է Արցախի պետական նախարար Ռուբեն Վարդանյանը։

Ադրբեջանը փորձում է իր սադրանքները կապել իմ այստեղ գալու հետ, բայց իրականում, ուղղակի, ամեն ինչ անում է, որ մարդիկ հիասթափվեն ու հեռանան Արցախից։ Այդ ամենը Ռուբենի հետ չի կապված, չնայած իմ անունը շատ է հիշատակվում։ Ադրբեջանի սադրանքները «կոտրելու» մաիկ տարբերակը Արցախում ապրելն ու միասնական լինելն է։ Ես եկել եմ այստեղ, որպեսզի իմ օրինակով ցույց տամ, որ չպիտի դուրս գանք այստեղից»,-ասել է Վարդանյանը։

Դեկտեմբերի 3-ին Գորիս-Ստեփանակերտ ճանապարհը փակելը, Վարդանյանի խոսքով, զարմանալի չէր. Արցախում հոկտեմբերի 30-ին կայացած մեծ հանրահավաքը, որին շուրջ 40 հազար մարդ էր մասնակցում, ըստ նրա, անսպասելի էր Ադրբեջանի համար։

Արցախի պետնախարարը նաև շեշտել է՝ Ադրբեջանի հետ ինչ-որ ձևով հարաբերություններ հնարավոր է լինեն միայն մի դեպքում. եթե վերջինս ընդունի, որ Արցախն անկախ երկիր է։
Հայաստան-Արցախ հարաբերություններին անդրադառնալով՝ Արցախի պետնախարարն ընդգծել է՝ 1988 թվականին դրված նպատակը, այսինքն Հայաստանի հետ միացումը մնում է անփոփոխ, բայց դրան հասնելու ուղիները լուրջ քննարկելու կարիք կա։

«Ես վստահ եմ, որ մեր միակ նպատակը պետք է լինի 1988-ի նպատակին հասնելը, բայց թե ինչ քայլերով, դա պահանջում է շատ զուսպ ու խորքային գործ, որը երազներով ու հայտարարություններով չի որոշվելու, այլ հայրենասիական աշխատանքով»,-ասել է նա։

Մանրամասները՝ տեսանյութում

Աղբյուր` Փաստինֆո