Փաստ ինֆո

Լրանում է ՍԴ անդամ Արևիկ Պետրոսյանի պաշտոնավարման ժամկետը, ընդ որում՝ հակասահմանադրական գործընթացների հետևանքով։ Դատավոր Արևիկ Պետրոսյանը պետք է դեռ 15 տարի պաշտոնավարեր ՍԴ դատավորի կարգավիճակում, որովհետև այն պահին, երբ նա ընտրվել, նշանակվել է ՍԴ դատավոր,այդ պահի օրենսդրությունը նրան հնարավորություն էր տալիս ունենալ պաշտոնավարման այդ ժամկետը, սակայն 2020 թվականի հակասահմանադրական փոփոխությունների հետևանքով ապօրինաբար կրճատվել է դատավոր Արևիկ Պետրոսյանի պաշտոնավարման ժամկետը. «Փաստինֆո»-ի փոխանցմամբ, այս մասին իր ուղիղ հեռարձակման ժամանակ հայտարարել է ՍԴ աշխատակազմի նախկին ղեկավար Էդգար Ղազարյանը։

«Տիկին Պետրոսյանին պետք է ՍԴ դատավորի պաշտոնում փոխարինի քաղաքական գործիչ, Նիկոլ Փաշինյանի փաստաբանական խմբի մի անդամ, մարտի 1-ի գործով փաստաբան Սեդա Սաֆարյանը»,- շեշտում է Էդգար Ղազարյանը՝ հավելելով, որ Սեդա Սաֆարյանը քաղաքական գործիչ է, իր մասնագիտական որակներով և արժանիքներով էլ հեռու է ՍԴ դատավորի համար պահանջվող մասնգիտական որակներից։
Այնուհետև պարզաբանելով իր մեկնաբանությունները, Էդգար Ղազարյանը որոշ մանրամասներ հրապարակեց 2020 թվականին ՍԴ շուրջ ծավալված՝ իր բնորոշմամբ՝ ապօրինի և հակասահմանադրական գործողություններից։
Մասնավորապես՝ ՍԴ աշխատակազմի նախկին ղեկավարը շեշտեց, որ 2020 թվականին,երբ ապօրինաբար սահմանադրական փոփոխություներ իրականացրեց ԱԺ-ն, 3 դատավորներ դադարեցրեցին իրենց գործունեությունը, և այդ ժամանակ շատերին թվում էր, թե միայն 3 դատավորներն ու Հրայր Թովմասյանն էին տուժում, Իսկ իրականում տուժում էին բոլորը։ Էդգար Ղազարյանի ներկայացմամբ՝ իշխանությունները սկզբում որոշեցին իրականացնել սահմանադրական հանրաքվե, սակայն նախընտրական քարոզարշավի ընթացքում հասկանալով որ չեն կարողանալու իրագործել իրենց նպատակը, գնացին այլ ճանապարհով և ԱԺ-ի միջոցով իրագործեցին իրենց ապօրինի մտադրությունը։

«Նպատակ ունեին ոչ միայն Հրայր Թովմասյանին զրկել ՍԴ նախագահի պաշտոնից, այլև ՍԴ 7 դատավորների։ Այսինքն՝ այդ ժամանակ ՔՊ ընկալումներով, ՍԴ-ում պետք է մնային պաշտոնավարելու միայն Վահե Գրիգորյանը, որն իրենց կողմից էր ընտրվել, և Արման Դիլանյանը, որն արդեն ապօրինաբար զավթել է ՍԴ նախագահի պաշտոնը և որի հետ նրանք արդեն ունեին քաղաքական պայմանավորվածություններ։ Հետո քարոզարշավի ժամանակ հասկացան, որ չեն կարող իրականացնել իրենց մտադրությունները, կոռոնավիրուսի պատրվակով հայտարարեցին արտակարգ դրություն, թեև կարանտին կարող էին հայտարարել՝ առանց արտակարգ դրություն հայտարարելու, իսկ երբ հայտարարվում է արտակարգ դրություն, արդնե չեղարկվում են ընտրությունները հանրաքվեները և այլն։ Սրանք հայտարարեցին արտակարգ դրություն, որպեսզի չեղարկվի հանրաքվեն և գնացին անօրինական ճանապարհով և ԱԺ կողմից կատարեցին փոփոխություն, ինչի իրավունքն իրենք չունեին, և ԱԺ-ն այդ հոդվածներում փոփոխություններ կատարելու իրավունք չուներ։ Ըստ էության ձևավորվեց անօրինական հանցավոր կազմավորված մի խումբ, որն ապօրինաբար տիրացավ ՍԴ-ում իշխանությանը»,- ներկայացրեց Էդգար Ղազարյանը՝ հավելելով, որ դա պետք էր անել, որպեսզի ՍԴ անդամներից 5-ը լինեին իրենց քաղաքական թիմից՝ իերնց վերահսկողության տակ։

Որովհետև ՍԴ-ն կազմված է 9 դատավորներից, և եթե այդ 9-ից 5-ը կողմ է քվեարկում որևէ հարցի շուրջ,ապա դա ընդունվում է։ Այսինքն, եզրակացնում է Էդգար Ղազարյանը, իշխանություններին ոչ թե պետք է որ որևէ բարեփոխում ՍԴ-ում, դատարանի համապատասխանեցում Սահմանադրության ոգուն, այլ ընդամենը 5 ձայն, իրենց որոշումներն ընդունելու համար։

«Արդյունքում ստացվեց, որ ՍԴ 5 անդամներ դարձան ոչ լեգիտիմ։ Ու հիմա Արևիկ Պետրոսյանի լիազորությունների դադարումով ստացվում է, որ ՍԴ-ում մնում է ընդամենը 2 օրինական դատավոր՝ Հրայր Թովմասյանն ու Արայիկ Թունյանը»,- ընդգծում է Էդգար Ղազարյանը։

Մանրամասները՝ տեսանյութում

Աղբյուր` Փաստինֆո