Փաստ ինֆո

Վերաքննիչ քրեական դատարանի դատավոր Մհեր Արղամանյանը չի քննի Սյունիքի մարզի ընդհանուր իրավասության (լիազորությունները կասեցված են) դատարանի դատավոր Բորիս Բախշիյանի արդարացման դատավճռի դեմ բողոքը։

Ինչպես արդեն տեղեկացրել ենք՝ Բախշիյանի արդարացման դատական ակտի դեմ բողոքներ ներկայացվել են ինչպես դատախազության, այնպես էլ՝ պաշտպանի կողմից, որոնք նոյեմբերի 30-ին մակագրվել են Վերաքննիչ քրեական դատարանի դատավոր Գրիգոր Հովհաննիսյանին, դատարանի կազմում ընդգրկված են եղել նաև դատավորներ Լուսինե Աբգարյանը և Մհեր Արղամանյանը, որի պարագայում առկա են եղել ինքնաբացարկի հիմքեր։ Մասնավորապես, մինչդատական վարույթում Բախշիյանի նկատմամբ կալանավորումը որպես խափանման միջոց կիրառվել է դատավոր Մհեր Արղամանյանի որդու՝ դատավոր Դավիթ Արղամանյանի որոշմամբ։ Վերջինս հանրությանը հայտնի է նաև որպես «թմբուկահար-դատավոր», քանի որ մինչ դատավորի պաշտոնում նշանակվելը եղել է «ՔՊ» իրավախորհրդատու, աշխատել նախարարությունում, իսկ 2018թ -ին Նիկոլ Փաշինյանի ղեկավարած ակցիաների ժամանակ թմբուկ խփել։

Ըստ այդմ, դատավոր Մհեր Արղամանյանն ինքնաբացարկ է հայտնել։
«Հաշվի առնելով, որ սույն գործի հանրային հնչեղության և դատավոր Բ.Բախշիյանին կալանավորելու հետ կապված տարաբնույթ կարծիքների ու գնահատականների պայմաններում օբյեկտիվ դիտորդի մոտ կարող են ողջամիտ կասկածներ առաջանալ իմ անաչառության վերաբերյալ, ինչն ինքնին չի կարող չազդել ու չկաշկանդել ինձ, հանգում եմ այն հետևության, որ պետք է հայտնեմ ինքնաբացարկ»,- նշված է որոշման մեջ։
Հիշեցնենք, որ դատավոր Բորիս Բախշիյանի նկատմամբ քրեական հետապնդում էր իրականացվում Նիկոլ Փաշինյանի աջակից Նվեր Մկրտչյանին կալանավորելու որոշում կայացնելու համար։ Ըստ նախաքննական մարմնի նախնական վարկածի, Մկրտչյանին դատավորն ակնհայտ ապօրինի կալանավորելու որոշում է կայացրել, թեեւ ամբաստանյալն ինքը չէր ներկայացել դատական նիստին՝ դրսևորելով ոչ պատշաճ վարքագիծ։ Ավելին, դատախազությունը չէր բողոքարկել դատական նիստերին չներկայացվող ամբաստանյալի խափանման միջոցը փոխելու ու կալանավորելու որոշման դեմ։ Դատավորին ի սկզբանե մեղադրանք էր առաջադրվել ՀՀ քրեական օրենսգրքի 348-րդ հոդվածի 3-րդ մասով՝ անձին ապօրինի կալանավորելու հատկանիշներով, որն առաջացրել է ծանր հետևանք։ Վարույթն իրականացնող մարմինը որպես ծանր հետևանք էր դիտարկել այն հանգամանքը, որ ամբաստանյալ Մկրտչյանի նկատմամբ, «Գորիս» ՔԿՀ-ում, իբրև ազդեցություն է գործադրվել՝ հարկադրելով փոխել ցուցմունքը, ինչն էլ հանգեցրել է նրան, որ Քաջարանի համայնքապետ Մանվել Փարամազյանի խափանման միջոց կալանավորումը փոխարինվի գրավով։ Քրեական գործով նախաքննության ավարտ է հայտարարվել, ու նախաքննական մարմինը հրաժարվել է իր նախնական մեղադրանքից, Բախշիյանի մեղադրանքը վերաորակվել և մեղադրանք է առաջադրվել ՀՀ ՔՕ 348-րդ հոդվածի 2-րդ մասով՝ ակնհայտ ապօրինի կալանավորելու հատկանիշներով։

Սյունիքի մարզի ընդհանուր իրավասության դատարանը՝ դատավոր Լուսինե Սեփխանյանի նախագահությամբ, սեպտեմբերի 28-ին հրապարակել էր արդարացման դատական ակտը՝ ճանաչելով և հռչակելով Բախշիյանի անմեղությունը։ Դատավորն արդարացվել է հանցակազմի բացակայության հիմքով։
ՀՀ գլխավոր դատախազ Աննա Վարդապետյանի անունից վերաքննիչ բողոք է ներկայացվել, որով դատախազությունը պահանջում է բեկանել առաջին ատյանի դատարանի որոշումը և մեղավոր ճանաչել Բախշիյանին՝ որպես պատիժ նշանակելով հանրային ծառայության պաշտոններ և հանրային պաշտոններ զբաղեցնելու իրավունքից զրկելը՝ 5 տարի ժամկետով, ՀՀ քրեական օրենսգրքի 79-րդ հոդվածի համաձայն մեղմացնել նշանակված պատիժը և վերջնական պատիժ սահմանել հանրային պաշտոն զբաղեցնելու իրավունքից զրկելը՝ 4 տարի ժամկետով: Արդարացման դատական ակտի դեմ վերաքննիչ բողոք ներկայացրել է նաև Բորիս Բախշիյանի պաշտպան Երեմ Սարգսյանը՝ պահանջելով Բորիս Բախշիյանին արդարացնել հանցագործության դեպքի բացակայության հիմքով։ Մասնավորապես, ինչպես արդեն նշվել է, դատարանը Բախշիյանին արդարացրել է՝ նրա արարքում հանցակազմի բացակայության հիմքով և, այժմ պաշտպանության կողմը պահանջում է Բախշիյանին արդարացնել հանցադեպի բացակայությամբ՝ գտնելով, որ հանցագործության դեպք առհասարակ առկա չէ։

Պաշտպանության կողմը բարձրաձայնել է նաև քրեադատավարական նորմերի էական խախտումների հանգամանքը և Վերաքննիչ դատարանից պահանջում է արձանագրել դրանք, ինչը հանգեցրել է նաև դատավորի իրավունքների խախտման։ Պաշտպանը պահանջում է հաստատել փաստաբան Յուրա Ավայանի ցուցմունքների՝ անթույլատրելի ապացույց լինելու հանգամանքը։

Հեղինակ՝ Իզաբել Աահակյան

Աղբյուր` Փաստինֆո