Փաստ ինֆո

Բուլղարիայի ազգային ժողովը (խորհրդարանը) ուրբաթ օրը վավերացրել է Բուլղարիայի և Ուկրաինայի պաշտպանության նախարարությունների միջև Կիևին ռազմական օգնություն տրամադրելու մասին համաձայնագիրը, հայտնում է Sofia Globe պարբերականը:

Նոյեմբերի սկզբին Բուլղարիայի խորհրդարանը հավանություն է տվել Ուկրաինային զենքի մատակարարմանը։ Որոշման նախագծում, որն ընդունվել է արտաքին քաղաքականության եւ պաշտպանության կոմիտեների համատեղ նիստում, ասվում էր, որ Բուլղարիան պետք է Ուկրաինային ռազմական օգնության փաթեթ պատրաստի մեկ ամսվա ընթացքում: Բացի այդ, երկրի իշխանություններին հանձնարարվել է Կիևի հետ համաձայնագիր պատրաստել, որը պետք է վավերացներ խորհրդարանը։

Sofia Globe-ի տվյալներով՝ ուրբաթ երկրի խորհրդարանն առաջին ընթերցմամբ հաստատել է նաև կառավարության կողմից պատրաստված սպառազինությունների գաղտնի ցուցակը, որոնք կուղարկվեն Ուկրաինա։ Պարբերականի տեղեկություններով՝ առաջարկված ցանկին կողմ է քվեարկել 148 պատգամավոր, դեմ՝ 46, ձեռնպահ՝ մեկը։ Չնայած Կիևին ռազմական օգնության փաթեթի կազմը գաղտնի է, դեկտեմբերի սկզբին Բուլղարական հեռագրական գործակալությունը (ԲՀԳ), վկայակոչելով երկրի էկոնոմիկայի նախարար Նիկոլա Ստոյանովին, հաղորդել էր, որ Սոֆիան փոքր զենք և զինամթերք կմատակարարի Ուկրաինային:

Բացի սպառազինություն ուղարկելուց, ինչպես գրում է Sofia Globe-ը, Բուլղարիան կընդունի մինչև 60 ուկրաինացի զինծառայողների, որոնք վերապատրաստվելու են որպես զինվորական բժիշկներ։ Բացի այդ, մինչև 50 բուլղարացի զինծառայողներ կմասնակցեն Բուլղարիայում կամ ԵՄ այլ երկրում ուկրաինացի զինվորականներին զենքի և տեխնիկայի օգտագործման ուսուցմանը: Եվս հինգ բուլղարացի զինվորականներ կուղարկվեն եմ բազմազգ հրամանատարության կազմում՝ Լեհաստանում կամ Գերմանիայում ուսուցման հարցում օգնելու համար։

Աղբյուր` Փաստինֆո