Փաստ ինֆո

ԲԴԽ նախկին նախագահ Ռուբեն Վարդազարյանի և ԲԴԽ նախագահի նախկին պաշտոնակատար Գագիկ Ջհանգիրյանի միջև խոսակցության ձայնագրության հրապարակման առթիվ նախաձեռնված քրեական վարույթը կարճվել է՝ հանցանքի բացակայության հիմքով։ ՀՀ քննչական կոմիտեից «Փաստինֆո»-ի հետ զրույցում հայտնեցին, որ վարույթի շրջանակներում իրականացվել են բազմաթիվ վարութային և ապացուցողական գործողություններ։

«Այդ գործողությունների արդյունքներով պայմանավորված՝ վարույթն իրականացնող մարմինը միջնորդություն է ներկայացվել հսկող դատախազին Գագիկ Ջհանգիրյանի, Վիգեն Քոչարյանի և Սերգեյ Չիչոյանի նկատմամբ հանրային քրեական հետապնդում չհարուցելու մասին, որը դատախազի կողմից բավարարվել է: Ըստ այդմ, դեկտեմբերի 7-ին վարույթ իրականացնող մարմինը որոշում է կայացրել քրեական վարույթը կարճելու մասին՝ քրեական օրենսգրքով նախատեսված որևէ հանցանքի բացակայությունը հաստատելու հիմքով»,- հայտնեցին ՀՀ քննչական կոմիտեից:

Հիշեցնենք, որ հունիսի 20-ին Ռուբեն Վարդազարյանը հրավիրած ասուլիսում աղմկահարույց ձայնագրություն էր հրապարակել, որով հիմնավորվում էր, որ ԲԴԽ նախագահի պաշտոնակատար Գագիկ Ջհանգիրյանը փորձել է պարտադրել Վարդազարյանին՝ հրաժարական տալ։ Աղմկոտ զրույց-պահանջը տեղի է ունեցել ընթրիքի սեղանի շուրջ, որին ներկա են եղել ոչ միայն Վարդազարյանն ու Ջհանգիրյանը, այլ նաեւ ԲԴԽ անդամ Ստեփան Միքայելյանը։

Հրապարակված ձայնագրությունից հետեւում էր, որ Վարդազարյանին վարչապետի անունից առաջարկվել է հրաժարական տալ, իսկ Ջհանգիրյանն էլ ստանձնել է միջնորդի դեր՝ երաշխավորելով, որ նրա նկատմամբ հետապնդումներ չեն իրականացվի, եթե հրաժարական ներկայացնի։ Ջհանգիրյանը հանրայինի եթերում անձամբ խոստովանել է, որ բանակցություններ իսկապես վարել է Վարդազարյանի հետ՝ հրաժարական տալու համար։ Ավելին, հայտարարել է, ԲԴԽ նախագահին հրաժարական պարտադրելն այնքան էլ հեշտ գործ չէ ու ինքը նրա նկատմամբ հոգեբանական հնարքներ է կիրառել, «կուտ» տվել։ Աղմկահարույց ձայնագրությունից և առավել անհասկանալի հարցազրույցից օրեր անց հայտարարվեց, թե Գագիկ Ջհանգիրյանն ունի առողջական խնդիրներ և ենթարկվել վիրահատության։ Ակնառու էր, որ Ջհանգիրյանը առողջական խնդիրների քողի ներքո պատրաստվում է հրաժարական տալ, իսկ հուլիսի 1-ին արդեն պաշտոնապես հաստատվեց՝ Ջհանգիրյանը հրաժարականի դիմում է ներկայացրել։

ՀՀ քննչական կոմիտեում Ռ. Վարդազարյանի կողմից հրապարակված ձայնագրության կապակցությամբ նախապատրաստված նյութերով նախաձեռնվել է վարույթ, որի շրջանակներում որպես վկա հարցաքննվել էր նաեւ Ստեփան Միքայելյանը։ ՔԿ պարզաբանումից պարզ է դառնում, որ վարույթի շրջանակներում Ջհանգիրյանից բացի հարցաքննվել են նաև ԲԴԽ անդամներ Վիգեն Քոչարյանը և Սերգեյ Չիչոյանը, որը Ջհանգիրյանի լիազորությունների դադարումից հետո եղել է նախագահի պաշտոնակատար։

Նկատենք, որ նրանք Ջհանգիրյանի և Վարդազարյանի հանդիպմանը, որի ընթացքում էլ կատարվել է աղմկահարույց ձայնագրությունը, ներկա չեն եղել, հետեւապես ենթադրվում է, որ Ռուբեն Վարդազարյանին՝ պաշտոնը թողնելու վերաբերյալ եղել են նաեւ պահանջ-առաջարկների այլ դրվագներ, այլ անձանց մասնակցությամբ։ Բացառված չէ, որ Վ. Քոչարյանն ու Չինչոյանը եւս եղել են նման անօրինական միջամտության փորձի բանագնաց-միջնորդներ, որոնց նկատմամբ քննիչը եւս որոշել է հետապնդում չիրականացնել։

Ռուբեն Վարդազարյանն ինքը լրատվամիջոցներին հայտնել էր, որ իր մասնակցությամբ առերես հարցաքննություն տեղի չի ունեցել, ներկայացվել են միջնորդություններ, որոնցում բարձրացվել է նաև առերեսումներ անցկացնելու անհրաժեշտության մասին։

Հեղինակ՝ Իզաբել Սահակյան

Աղբյուր` Փաստինֆո