Փաստ ինֆո

Լաչինի միջանցքը փակելու նպատակը ռուս խաղաղապահներին վարկաբեկելն էր, քանի որ Ադրբեջանի համար Արցախի հարցի վերջնական լուծումը պայմանավորված է՝ արդյո՞ք այդ տարածքում ՌԴ զինված ուժեր կլինեն, թե՞ ոչ: Բնականաբար, ռուսական կողմը դրան օպերատիվ արձագանքեց: Այս մասին «Փաստինֆո»-ի եթերում ասել է ռազմական փորձագետ, պահեստազորի գնդապետ Հայկ Նահապետյանը:

Բանախոսի դիտարկմամբ, անմիջական շփման գծում ադրբեջանցիները փորձում են հայկական բնակավայրերի բնակիչների հետ որոշակի կոնտակտ ունենալ և սադրիչ գործողություններ իրականացնել:

Խնդիրն այն է, թե մեր հայրենակիցները և ռուսական կողմը որքանով են պատրաստ Արցախում սադրանքներին դիմակայելուն:

«Ադրբեջանը հետ չի կանգնելու այն մտքից, որ Արցախի խնդրի լուծումը Արցախը ամբողջովին հայաթափելն է, և ըստ իս, նրանք գործողություններ են անելու»,- կարծիք հայտնեց փորձագետը:

Անդրադառնալով հայ-ադրբեջանական պայմանավորվածություններին՝ բանախոսը նշեց, որ եռակողմ հայտարարության կողմերից մեկը Հայաստանն է, և հայկական կողմը փորձեց հայ-ադրբեջանական կամ արցախա-ադրբեջանական հարաբերությունների կարգավորման գործընթացում ներգրավել Միացյալ Նահանգներին կամ ԵԱՀԿ Մինսկի խմբի անդամներին: Հ. Նահապետյանի դիտարկմամբ, Պրահայում ձեռքբերված պայմանավորվածությունները հիմք հանդիսացան Սոչիում եռակողմ հանդիպման ժամանակ տեղի ունեցած քննարկման համար, որը բնավ չէր բխում ո՛չ Ռուսաստանի Դաշնության շահերից, ո՛չ Հայաստանի:

Խոսելով հայ-ռուսական հարաբերությունների մասին՝ փորձագետը հստակեցրեց, որ ցանկացած պետություն այլ պետության հետ հարաբերվում է ըստ ձեռքբերված պայմանավորվածությունների, որոնք վերջնարդյունքում ունենում են պայմանագրի տեսք: Ռուսաստանը Հայաստանի հետ պաշտպանական երեք վահան ունի՝ պայմանագրի տեսքով, ուստի Ռուսաստանը Հայաստանի պաշտպանությունից հետ չի կանգնի:

«Հայ-ադրբեջանական տարաբնույթ պայմանավորվածությունների ֆոնին Ալիևը, մեղմ ասած, գցում է Փաշինյանին: Փաշինյանը, Միացյալ Նահանգների միջնորդությամբ Ալիևի հետ Պրահայում որոշակի պայմանավորվածության է գալիս, և դրա մասին շատ արագ իմանում է Ռուսաստանը: Վստահաբար, տեղեկատվությունը Ալիևն է ուղարկում»,- նշեց բանախոսը:

Մանրամասները՝ տեսանյութում:

Աղբյուր` Փաստինֆո