Փաստ ինֆո

Դատախազությունը պահանջում է խստացնել «Կոշ» ՔԿՀ նախկին պետ Լյովա Բաղդասարյանի պատիժը եւ մեղավոր ճանաչել նաև առանձնապես խոշոր չափերով յուրացում և պաշտոնեական կեղծիք կատարելու հատկանիշներով։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, մեղավոր է ճանաչել Լյովա Բաղդասարյանին՝ ՀՀ քրեական նախկին օրենսգրքի 311-րդ հոդվածով՝ «Զոն նայող» դատապարտյալից կաշառք ստանալու համար ՝ դատապարտելով 5 տարվա ազատազրկման։ Նշանակված պատժում հաշվակցելով Լյովա Բաղդասարյանի՝ նախաքննության ընթացքում կալանքի տակ գտնվելու 3 ամիս ժամկետը՝ դատարանը որպես վերջնական պատիժ է սահմանել ազատազրկումը՝ 4 տարի 8 ամիս ժամկետով։ Առանձնապես խոշոր չափերով յուրացում կատարելու և պաշտոնատար անձի կողմից շահադիտական նպատակներով պաշտոնեական փաստաթղթերում կեղծ տեղեկատվություն ներառելու վերաբերյալ առաջադրված մեղադրանքներում դատարանը հանցակազմի բացակայության հիմքով արդարացրել է Լյովա Բաղդասարյանին՝ ճանաչելով և հռչակելով վերջինիս անմեղությունը։ Լյովա Բաղդասարյանին կաշառք տալու մեջ մեղադրվող «զոն նայող» դատապարտյալը՝ Հայկ Կարապետյանը, և Արթուր Հովհաննիսյանը, որը մեղադրվում է կաշառք տալուն օժանդակելու մեջ, դատավճռով մեղավոր են ճանաչվել, նրանց նկատմամբ որպես վերջնակա պատիժ է սահմանվել ազատազրկումը՝ 2.5 տարի ժամկետով։ Դատարանը վերացրել էր Լյովա Բաղդասարյանի գույքի վրա դրված արգելանքը, իսկ իրեղեն ապացույց ճանաչված կաշառքի առարկա հանդիսացող 700.000 ՀՀ դրամը՝ որպես եկամուտ հանձնել պետությանը։

«Դատալեքս» դատական-տեղեկատվական համակարգից «Փաստինֆո»-ն տեղեկանում է, որ դատախազ Գուրգեն Սաֆարյանը դատավճռի դեմ վերաքննիչ բողոք է ներկայացրել՝ պահանջելով մասնակիորեն բեկանել դատական ակտը և մեղավոր ճանաչել Լյովա Բաղդասարյանին նաև առանձնապես խոշոր չափերով յուրացում և պաշտոնեական կեղծիք կատարելու հատկանիշներով՝ նշանակելով համաչափ պատիժ։ Լյովա Բաղդասարյանի պաշտպանը դատավճռի դեմ բողոք չի ներկայացրել։ Պաշտպանության կողմից բողոք ներկայացրել է «զոն նայող» դատապարտյալի՝ Հայկ Կարապետյանի պաշտպանը՝ պահանջելով բեկանել դատավճիռը և կայացնել արդարացման դատական ակտ՝ ճանաչելով և հռչակելով նրա անմեղությունը։ Վերաքննիչ բողոքները քննվում են դատավոր Արմեն Հովհաննիսյանի նախագահությամբ, կազմով դատավորներ՝ Սերգեյ Մարաբյանի, Կարեն Ամիրյանի։

Հիշեցնենք, որ «Կոշ» ՔԿՀ նախկին պետ Լյովա Բաղդասարյանին մեղադրանք էր առաջադրվել ՀՀ քրեական օրենսգրքի (2003թ) 311-րդ հոդվածի 1-ին մասով, ՀՀ ՔՕ 314-րդ (2003թ) հոդվածի 1-ին մասով և նույն օրենսգրքի (2003թ) 179-րդ հոդվածի 1-ին մասի 3-րդ կետով՝ կաշառք ստանալու, պաշտոնատար անձի կողմից շահադիտական նպատակներով պաշտոնեական փաստաթղթերում ակնհայտ կեղծ տեղեկատվություն ներառելու և առանձնապես խոշոր չափերով յուրացում կատարելու համար:

Հայկ Կարապետյանին մեղադրանք է առաջադրվել ՀՀ քրեական օրենսգրքի 312-րդ հոդվածի 2-րդ մասով՝ խոշոր չափերով կաշառք տալու համար, իսկ Արթուր Հովհաննիսյանին՝ ՀՀ քրեական օրենսգրքի 38-312-րդ հոդվածի 2-րդ մասով՝ խոշոր չափերով կաշառք տալուն օժանդակելու համար:

Ըստ քրեական գործի՝ Լյովա Բաղդասարյանը մեղադրվում է քրեակատարողական հիմնարկում ազատազրկման ձևով պատիժ կրող դատապարտյալների օգտին ակնհայտ ապօրինի անգործության, այն է՝ ռեժիմի խախտման դեպքերը չարձանագրելու, շրջանառությունն արգելված իրեր հայտնաբերելուն ուղղված միջոցառումներ չիրականացնելու, որոշ դատապարտյալների համար արտոնյալ պայմաններ ստեղծելու համար, քրեական հեղինակություն վայելող այսպես կոչված՝ զոն նայող դատապարտյալ Հայկ Կարապետյանի, ինչպես նաև քրեական հեղինակություն վայելող Արսեն Հովհաննիսյանի կազմակերպմամբ հավաքագրված գումարներից՝ ՀՀ ԱՆ «Կոշ» ՔԿ հիմնարկի նախկին դատապարտյալ Արթուր Հովհաննիսյանի միջոցով, 2019թ․ սեպտեմբերի 17-ին Երևան քաղաքի Նորք-Մարաշ վարչական շրջանի Արմենակյան փողոցի 197 հասցեում գործող ավտոլվացման կետում ստացել է խոշոր չափերով՝ 700,000 ՀՀ դրամ կաշառք, որից հետո բռնվել է ՀՀ ԱԱԾ աշխատակիցների կողմից։

Նշենք, որ գործով մյուս մեղադրյալ Հայկ Կարապետյանը դատապարտված է եղել սպանության և ապօրինի զենք-զինամթերք կրելու համար և համարվում է քրեական հեղինակություն կամ ինչպես ասում են՝ «զոն նայող» դատապարտյալ: Վերջինս, ըստ մեղադրանքի, իր և նշված հիմնարկում ազատազրկման ձևով պատիժ կրող դատապարտյալների օգտին ակնհայտ ապօրինի անգործության, այն է՝ ռեժիմի խախտման դեպքերը չարձանագրելու, շրջանառությունն արգելված իրեր հայտնաբերելուն ուղղված միջոցառումներ չիրականացնելու, որոշ դատապարտյալների համար արտոնյալ պայմաններ ստեղծելու համար, իր և այլոց կազմակերպմամբ հավաքագրված գումարներից նախկին դատապարտյալ Արթուր Հովհաննիսյանի միջոցով խոշոր չափերով՝ 700,000 ՀՀ դրամ կաշառք է տվել վերը նշված քրեակատարողական հիմնարկի պետ Լյովա Բաղդասարյանին։

Հեղինակ՝ Իզաբել Սահակյան

Աղբյուր` Փաստինֆո