Փաստ ինֆո

Քաղաքական դաշտը հիմա ավելի շատ նախագծերի մեջ է, քան զբաղվում է հայակենտրոն քաղաքականությամբ, իսկ եղած խմբերը՝ կուսակցությունները կամ հասարակական կազմակերպությունները, միանալով առանձին նախագծերի, արդեն սեփական տեսակետ քիչ են հայտնում. «Փաստինֆո»-ի հետ զրույցում նշեց քաղաքական գործիչ, ՍԻՄ կուսակցության համահիմնադիր Հրանտ Խաչատրյանը։

Այդ խմբերի հայտնած տեսակետն էլ,մեր զրուցակցի դիտարկմամբ, ավելի շատ արտահայտում է որևէ խմբի ավելի նեղ շահերը։

Անդրադառնալով Արցախի շուրջ ներկայումս ծավալվող իրադարձություններին՝ Հրանտ Խաչատրյանը նշում է՝ այս ամբողջ ընթացքում մենք այդպես էլ չկարողացանք Լեռնային Ղարաբաղ եզրույթից ազատվել մեր լեզվամտածողության մեջ, և դրա հետևանքները հիմա ավելի ընդգծված ենք զգում։ Իսկ դիտարկմանը, թե միգուցե այդ տերմինո՞վ է միջազգային հանրությունը ճանաչում արցախյան հիմնախնդիրը, մեր զրուցակիցը ընգծեց՝ միջազգային հանրությունը ճանաչում է այնպես, ինչպես ներկայանում ես։

Նա հիշեց, որ դեռևս 1987-88 թվականներին համընդհանուր տպավորություն կար, թե արցախյան հարցը կկարգավորվի շատ արագ, ինքը ինժեներական աչքաչափով վստահ էր, որ այն նվազագույնը 10 տարի կտևի։ Իսկ հիմնախնդիրը ձգվում է մինչ օրս։ Ներկայումս նրա մասնագիտական աչքաչափը հուշում է, որ եթե մարդկությունը իր գոյությունը շարունակելու է, իսկ դա այսօր մազից է կախված՝ հաշվի առնելով միջուկային պատերազմի վտանգը, ապա հայությունը պետք է շարունակի իր գոյամարտը։ Դրա համար ռեսուրսներ միշտ կան, վստահ է Հրանտ Խաչատրյանը, պարզապես նպատակը պետք է շատերի համար օգտակար ու ցանկալի լինի, և այդ ժամանակ ռեսուրսներն իրենք կհայտնվեն։ Այդ ռեսուրսներից գործիչն առանձնացրեց մեր աշխարհագրական դիրքը, որի համար շատերն են պայքարել և մինչ օրս էլ պայքարում են։ Ընդամենը պետք է կարողանալ կառավարել այդ ռեսուրսը, իսկ մենք չենք էլ փորձում, եզրափակեց Հրանտ Խաչատրյանը։

Մանրամասները՝ տեսանյութում

Աղբյուր` Փաստինֆո