Փաստ ինֆո

Ադրբեջանցի «էկոլոգների» խմբի այցն Արցախ ուղեկցվում էր լրագրողների կողմից պրովոկացիաներով, - «Փաստինֆո»-ին ասաց պատմական գիտությունների թեկնածու, ադրբեջանագետ Տաթևիկ Հայրապետյանը՝ մատնանշելով համացանցում հայտնված տեսանյութերը, որտեղ ադրբեջանցի լրագրողները փորձում էին հատել միջանցքը՝ անցնել ռուսական հենակետերը և գնալ կա՛մ Ստեփանակերտ, կա՛մ Իվանյան։

Արդեն ռուս խաղաղապահ զորախմբի հրամանատարի հետ հանդիպումից հետո էկոլոգները հայտարարեցին, թե ռուսական կողմին տեղեկացրել են, որ իրենք անթույլատրելի են համարում Արցախի հանքերի շահագործումը։

«Ի՞նչն է այստեղ նաև հետաքրքիր, որ տեսանյութերում, որոնք այդ լրագրողները հրապարակեցին, նշում էին, որ իրենց ներս չեն թողնում, բայց մյուս կողմում կային իրանական բեռնատարներ։ Եվ իրանի քաղաքացիների ու իրանական մեքենաների թեզը շատ ինտենսիվ էր շրջանառվում իրանական քարոզչադաշտում։ Մոտավորապես մեկ շաբաթ առաջ սկսեցին շրջանառել, որ 14 իրանցի հետախուզական ծառայությունների ներկայացուցիչներ մտել են Արցախ, դրանից հետո նոր անուններ հրապարակվեցին, ու այս թեման շատ ակտուալ էր պահվում։ Այս ամենով՝ ադրբեջանական կողմը մի քանի խնդիրներ է փորձում լուծել՝ ուզում են ցույց տալ, որ, իբր, միջանցքը նպատակային չի ծառայում, հորինում են տարբեր ապատեղեկատվություններ, թե, իբր, այնտեղով զինտեխնիկա է անցնում և այլն։ Ու նաև ուշագրավ էր հանգամանքը, որ այդ ընթացքում, երբ ընթանում էր այդ պրովոկացիոն գործընթացը միջանցքի երկայնքով, իրենք մեկ էլ ապատեղեկատվություն են տարածում, թե իբր Քարվաճառի կողմից Արցախի պաշտպանության բանակը խախտել է հրադադարը։ Այսինքն՝ ընդամենը 1 ժամվա մեջ նրանք միանգամից մի քանի սադրանք ու ապատեղեկատվություն տարածեցին»,- «Փաստինֆո»-ի հետ զրույցում նշեց Տաթևիկ Հայրապետյանը։

Նրա դիտարկմամբ՝ այս ամենի գերնպատակն է այնպես անել, որ Արցախում ապրող հայերն ունենան անապահովության խորը զգացում, ինչպես վերջապես խոստովանեց խաղաղապահ առաքելության ղեկավար Վոլկովը, որ ադրբեջանցիները դիսկրեդիտացիայի են ենթարկում՝ արժեզրկում են խաղաղապահների գործունեությունը, որպեսզի Արցախի հայ ազգաբնակչությունն իրեն վտանգի մեջ զգա։

«Շատ լավ է, որ ռուսները հասկացել են, որ դրանք ադրբեջանական սադրանքներ են և էլ ավելի լավ կլինի, որ ադրբեջանցիների սադրանքները համարժեք արձագանք ստանան խաղաղապահների կողմից։ Բայց խնդիրը միայն խաղաղապահները չեն։ Խնդիրն այն է, որ երբ ՌԴ արտգործնախարարը հանդիպում է Ադրբեջանի արտգործնախարարի հետ, ոչ թե պետք է գլուխը կախ լսի, թե ինչպես է Բայրամովը հայտարարում, թե իբր Լաչինի միջանցքն աննպատակահարմար է օգտագործվում, այլ հստակ արձագանք տա, որովհետև այդ միջանցքի անվտանգության երաշխավորը հենց իրենց պետությունն է»- ասաց ադրբեջանագետը։

Տաթևիկ Հայրապետյանի դիտարկմամբ՝ բնապահպանական սադրանքները, ոսկու հանք մուտք գործելու ջանքերը և մնացած բոլոր մյուս սադրանքները՝ ընդամենը պրովոկացիոն հիմք է։ Ադրբեջանական կողմը փորձում է բոլոր ձևերով ամեն տեսակ կենսամիջոցից զրկել Արցախի հայերին։

«Մենք անընդհատ արձագանքում ենք ադրբեջանական օրակարգերին․ Մենք այսօր խնդիր ունենք մեր օրակարգերը ստեղծելուն, իսկ դա չկա։ Մենք անընդհատ այրվող իրավիճակների ենք արձագանքում, բայց Ադրբեջանի ո՛չ ձեռագիրը, ո՛չ բուն նպատակը դրանով չի փոխվում։ Լինի դա էկոլոգների, լրագրողների, թե գյուղերում ագրեսիայի տեսքով՝ նրանց գործողությունների նպատակը մեկն է՝ հայաթափել Արցախը։ Կարծում եմ, որ Հայաստանում ու Արցախում պետք է ավելի խելացի, միասին աշխատելով ճիշտ ու համարժեք արձագանքներով առաջ գնալ, ինչպես նաև թելադրել սեփական օրակարգը»- ասաց Տաթևիկ Հայրապետյանը։

Նա վստահ է, որ Ադրբեջանն իր առջև դրել է Լաչինի միջանցքի վերահսկողությանը գոնե մասնակցություն ունենալու խնդիրը։ Այս առումով ադրբեջանագետը մատնանշում է, որ դեռ մինչև այս բոլոր զարգացումները, երկու հիմնական մոտեցում էին շրջանառում. մեկը՝ որ լինի ադրբեջանական անցակետ, երկրորդ՝ ինչպես Ակնայում ռուս-թուրքական համատեղ մոնիտորինգային կենտրոնն է, նույնը լինի նաև միջանցքում։

«Բայց եթե արձագանքները համարժեք լինեն մեր կողմից և ցույց տրվի որ դրանք նոյեմբերի 9-ի պայմանավորվածությունների խախտում է և անթույլատրելի է, արդեն մենք կկարողանանք այդ ամենը չեզոքացնել։ Բայց մենք սպասում ենք, որ իրադարձությունը պատահի,հետո մտածենք, թե ինչպես ենք դա հաղթահարելու։ Մինչդեռ քարոզչադաշտի ուսումնասիրությունը միշտ հնարավորություն տալիս է մեկ շաբաթ, 10 օր, մեկ ամիս առաջ հասկանալ, թե ինչ զարգացումներ են լինելու, ու դրան համահունչ գործել»,- եզրափակեց Տաթևիկ Հայրապետյանը։

Աղբյուր` Փաստինֆո