Փաստ ինֆո

Միայն նոյեմբեր ամսին Վրաստանում մոտ 2000 տոննա գյուղմթերք է թափվել՝ Վերին Լարսի անցակետի վատ աշխատանքի պատճառով։ Այս մասին «Փաստինֆո»-ին տեղեկացրեց Ագրարագյուղացիական միավորման նախագահ Հրաչ Բերբերյանը՝ նշելով, որ այս տվյալները ստացել են ահազանգերով ու միավորման ներկայացուցիչի այցելության ու տեղում իրավիճակին ծանոթանալու միջոցով։

Նրա խոսքով՝ դեռ վաղ է խոսել նաև այն մասին, թե այս իրավիճակի պատճառով գյուղատնտեսության ոլորտն ինչ ծավալի վնաս է կրել, որովհետև հաշվարկելն էլ բարդ է ու ժամանակ է պահանջում։

«Այս իրավիճակի լուծումը կա՝ դա բեռի ապահովագրությունն է։ Պետք է այնպես անել, որ այս վիճակն ընդհանրապես հանգուցալուծվի։ Հայաստան-Ռուսաստան մաքսակետային այս հարաբերությունները, վերջիվերջ,ո պետք է կարգավորվե՞ն, թե՞ ոչ։ Սա գալիս է ոչ միայն տնտեսությունից, այլ նաև, օրինակ, արտաքին քաղաքականությունից, դիվանագիտությունից և այլն։ Թուրքական կամ վրացական մեքենաները գալիս առանց հերթ անցնում են, իսկ հայկական բեռնատարները հերթի մեջ շարված են։ Դա ծիծաղելի է։ Եթե իմանանք, որ ուրիշներին էլ է դա վերաբերում, հասկանալի կլիներ,բայց ուրիշ երկրների ներկայացուցիչները հանգիստ գալիս ու անցնում են»,- իրավիճակը ներկայացրեց ագրարագյուղացիական միավորման նախագահը։

Իսկ եթե ամեն դեպքում, այս վիճակը շարունակվի, ինչպես նշեց մեր զրուցակիցը, հարկավոր է ուրիշ շուկաներ գտնել՝ նկատելով, որ շուկան այնպիսի բան է, որ շատ մեծ դժվարությամբ ձեռք ես բերում և հեշտությամբ կորցնում։

Հրաչ Բերբերյանի դիտարկմամբ՝ Ճանապարհների փակ լինելը բերելու է նրան, որ մենք Ռուսաստանի Դաշնությունից կտրվում ենք, և ագրարագյուղացիական միավորման նախագահը կասկածներ ունի, որ այս ամենը միտումնավոր է արվում։

Անդրադառնալով ստեղծված իրավիճակում գյուղատնտեսության ոլորտի կրած ընդհանուր վնասներին՝ Հրաչ Բերբերյանն ասաց, որ անհատներն են լուրջ վնասներ ունեցել՝ ովքեր ինքնուրույն են փորձել արտահանել, արտահանմամբ զբաղվող ընկերությունները լուրջ խնդիրներ ունեն։ Այս իրավիճակը, բնականաբար, խիստ բնականաբար ազդում է մթերումների ծավալների ու մթերման գների վրա, քանի որ պահանջարկի փոքրացումը հանգեցնում է գների իջեցմանը։

Օրինակ՝ նոր շուկա մտնող պտուղ-բանջարեղենի մթերումները խիստ տուժել են, նշում է Հրաչ Բերբերյանը, քանի որ մարդիկ արտադրել են հույսով, թե պետք է մթերեն ու արտահանեն, բայց հիմա մթերող չկա, իսկ հասունացած բերքը չեն կարող թողնել ջերմոցներում, այգիներում ու դաշտերում։

«Հիմա մենք սպասում էինք դեպի Ռուսաստանի Դաշնություն կարտոֆիլի լուրջ ծավալների արտահանման, քանի որ Ռուսաստանում այդ բերքը չկա, իսկ Ուկրաինան էլ ընդհանրապես այս տարի կարտոֆիլ չի տանում։ Եթե ռուսները բարեհաճեցին ու այդ սահմանը բացեցին, ուրեմն բավականին արտահանում կունենանք, իսկ եթե չբարեհաճեցին, ուրեմն այն շահույթը չենք ունենա, ինչին սպասում ենք։ Այսինքն՝ կարծում ենք, որ այս տարի կարող ենք մինչև 70 հազար տոննա կարտոֆիլ արտահանել»,- հայտնեց Հրաչ Բերբերյանը՝ նշելով, որ անցյալ տարի 48 հազար տոննա ենք արտահանել

Որպես ոչ միայն այս,այլև ընդհանրապես գյուղատնտեսության ոլորտի խնդիրների լուծում «Փաստինֆո»-ի զրուցակիցը շեշտում է վարչապետին կից գյուղատնտեսության հարցերով զբաղվող համակարգող խորհրդի ստեղծման անհրաժեշտությունը, որի որոշումները պարտադիր կլինեն պատկան մարմինների համար։

Աղբյուր` Փաստինֆո