Փաստ ինֆո

Սեպտեմբերից նվազագույն կենսաթոշակը ավելացել է ոչ թե 1900 դրամով, այլ ուղիղ 3000 դրամով՝ 28 հազար 600 դրամից դառնալով 31 հազար 600 դրամ։ Այս մասին ԱԺ-ում հայտարարեց ՔՊ խմբակցության պատգամավոր Գևորգ Պապոյանը՝ հակադարձելով «Հայաստան» խմբակցության պատգամավոր Թադևոս Ավետիսյանի հայտարարությանը։

Հիշեցնենք, որ Թ.Ավետիսյանն արձանագրել էր, որ 3000 աղքատ ընտանիք, որտեղ ապրում են կենսաթոշակառուներ, ինչպես նաև թերսնված երեխաներ, զրկվել են կենսապահովության նպաստից միմիայն նրա համար, որ իրենց ընտանիքի տատիկի կամ պապիկի թոշակը 3-4 հազար դրամով բարձրացել է։

«Անապահովության նպաստի չափը, պաշտոնական տվյալներով՝ 31500 դրամ է։ Թադևոս Ավետիսյանը շեշտեց՝ Վերցնում են կենսապահովության 31 հազար 500 դրամ նպաստը և տեղը տալիս են 4 հազար դրամ՝ անապահով ընտանիքներին, և սա կոչվում է սոցիալական քաղաքականություն»,- նշել էր ընդդիմադիր պատգամավորը։

Գեւորգ Պապոյանն էլ հայտարարել է, թե ամեն 100 դրամը մեծ գումար է պետական բյուջեի վրա։

«Միջին կենսաթոշակը եկող հուլիսին ևս 3000 դրամով կավելանա, որից՝ ընդ որում՝ նվազագույնը 4400 դրամով կավելանա»,- նոր տվյալներ հայտնեց քպական պատգամավորը։

Փորձելով հակադարձել աղքատության և գործազրկության վիճակի մասին Թադևոս Ավետիսյանի հնչեցրած ցուցանիշներին՝ ՔՊ-ական պատգամավորը նշեց, թե 2018 թվականին գործազրկությունը 19 տոկոս էր 2021 թվականին՝ 15.3 տոկոս, 2022 թվականի երկրորդ եռամսյակի տվյալներով՝ պատմական նվազագույնի է հասել՝ 13 տոկոս, ու ընդգծեց՝ «այսպիսի ցուցանիշ երբեք չի եղել»։

«Ասում եք՝ աղքատության ցուցանիշը 50 տոկոսով ավելացել է (թեև Թադևոս Ավետիսյանը նշել էր ոչ թե աղքատության,այլ ծայրահեղ աղքատության ցուցանիշը) նայում եմ ցուցանիշը՝ 26.5, 26.4 են»,- ասաց Պապոյանը։

Իր խոսքում ՔՊ խմբակցության պատգամավորը նաև հայտնեց, որ կենսաթոշակների համար 2023 թվականին 648.5 միլիարդ դրամ է հատկացվելու, 2018 թվականի համեմատ՝ 59 տոկոսով կամ 232 միլիարդ դրամով ավել։

Մանրամասները՝ տեսանյութում

Աղբյուր` Փաստինֆո