Փաստ ինֆո

ԱԺ նախկին պատգամավոր, «Անվտանգություն եւ ժողովրդավարություն» ՀԿ նախագահ Նաիրա Զոհրաբյանը «Փաստինֆո»-ի հետ զրույցում ահազանգում է՝ պատերազմում զոհվածների ընտանիքներին շատ մեծ դժվարությամբ են օրենքով սահմանված հատուցումը տրամադրում, հաճախ զոհվածների ընտանիքները ստիպված են լինում թղթաբանության հետ կապված քաշքշուկի մեջ ընկնել,իսկ շատ դեպքերում՝ այդպես էլ որևէ օժանդակություն չեն ստանում՝ ինչ-ինչ թղթերի բացակայության պատճառով:

Նաիրա Զոհրաբյանի մանրամասնում է՝ առավել հաճախ այդ խնդիրն առաջանում է այն դեպքերում, երբ չկա օրինական ամուսնություն.

«Եթեանգամ ընտանիքում երեխա կա, բայց ամուսինները զագսավորված չեն, կինը ստիպված քաշքշուկների մեջ է ընկնում, մինչև ամուսնության փաստը հաստատող մի թուղթ է գտնում, բայց շատ դեպքերում վերջում չեն էլ կարողանում այդ աջակցությունից օգտվե լ »,-ասում է Զոհրաբյանը և հավելում, որ խնդիրը մասամբ կարգավորվում է, երբ տղայի ընտանիքը հաստատում է, որ իրենց որդու երեխան է կամ առկա է հայրությունը ճանաչող փաստաթուղթ.

«Եթե ԶԱԳՍ-ը բացակայում է, բայց հայրը ճանաչել է հայրությունը, ծննդյան վկայականում հոր անուն-ազգանունը ֆիքսված է եղել, սա որոշակիորեն խնդիրը հեշտացնում է, բայց եղել են նաև դեպքեր, երբ մայրերը պատրաստ են եղել ԴՆԹ հանձնել, որպեսզի ապացուցվի, որ իրենց երեխան զոհվածի որդի է, սա էլ քաշքշուկի խնդիր է»,-ասաց Զոհրաբյանը:

Աջակցություն ստանալու հետ կապված խնդիրներ են առաջանում նաև զոհված զինվորների ընտանիքի մյուս անդամների հետ: Օրինակ, շատ դեպքերում, ծնողները դեմ են լինում, որ իրենց որդու չզագսավորված կինը գումարը ստանա և չեն հաստատում, որ երեխան իրենց թոռն է:

Զոհրաբյանի խոսքով՝ եղել է նաև դեպք, երբ փոքր որդին զոհվել է, մեծ եղբայրը արտերկրից եկել է և պահանջել է, որ տրամադրվող գումարից իրեն էլ պետք է բաժին տան

«Սրանք խնդիր են, որոնք համակարգային առումով կարգավորված չեն: Բայց ես ինչպես հասկանում եմ, որևէ մեկը չի զբաղվում այս հարցով, կանայք էլ դռնեդուռ ընկած փորձում են լուծել խնդիրը:

Գիտեք՝ աղքատների և ծայրահեղ աղքատների թիվը հենց Նիկոլ Փաշինյանի հաստատմամբ ինչ մեծ թվերի է հասել, նրանց մեջ մեծ մաս են կազմում այն ընտանիքները, ովքեր պատերազմի հետեւանքով զրկվել են կերակրողից, բայց նրանց էլ աջակցություն չեն տրամադրել»,-ասում է Նաիրա Զոհրաբյանը:

Աղբյուր` Փաստինֆո