Փաստ ինֆո

Ինչու՞ եք Ռոբերտ Քոչարյանի քաղաքից բացակայելու հարցը քննարկում դատական նիստերի դահլիճից դուրս, Արմեն Գևորգյանինը՝ դատական նիստերի դահլիճում։ Սա էլ որերորդ անգամն է։ Այս մասին հայտարարեց դատախազ Գևորգ Բաղդասարյանը՝ դիմելով դատավոր Աննա Դանիբեկյանին։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, այսօր հետաձգվել է ՀՀ երկրորդ նախագահ Ռոբերտ Քոչարյանի և ՀՀ նախկին փոխվարչապետ, ԱԺ «Հայաստան» խմբակցության պատգամավոր Արմեն Գևորգյանի գործով դատական նիստը։

Դատական նիստին ներկա չէր Ռոբերտ Քոչարյանը։ Փաստաբան Հովհաննես Խուդոյանը հայտնեց, որ Ռոբերտ Քոչարյանը չի կարողացել ներկայանալ դատական նիստին՝ առողջական խնդիրների պատճառով՝ միևնույն ժամանակ դատարանին ներկայացնելով բժշկակական փաստաթուղթը։ Բացի այդ, ինչպես պարզվեց, Ռոբերտ Քոչարյանին դատարանը թույլ էր տվել հատել ՀՀ սահմանը։ Դատարանի կողմից դատախազությանը փոխանցվել է գրություններ, համաձայն որի՝ դատարանը թույլատրել է՝ նոյեմբերի 29-ից դեկտեմբերի 5-ը, ապա նաև՝ դեկտեմբերի 6-13-ը ներառյալ Ռոբերտ Քոչարյանին բացակայել ՀՀ-ից։ Դատախազ Գևորգ Բաղդասարյանը հայտարարությամբ հանդես եկավ՝ առարկելով դատարանի գործողությունների դեմ։

«Ինչի մասին է խոսքը։ Ինչու է դատարանը վարութային բնույթի հարցերը լուծում դատական նիստերի դահլիճից դուրս ՝ աշխատասենյակում։ Խափանման միջոց գրավի պայմաններից մեկը կառավարության որոշման համաձայն սահմանահատման արգելքն է։ Դուք խափանման միջոցը փաստացի չեզոքացնում եք՝ դատական նիստերի դահլիճից դուրս։ Ինչու եք Ռոբերտ Քոչարյանի քաղաքից բացակայելու հարցը քննարկում դատական նիստերի դահլիճից դուրս»,- ասաց Գևորգ Բաղդասարյանը, ինչին արձագանքելով՝ նախագահողը նախ նշեց, որ դատարանը պարտավոր չէ որևէ պարզաբանում ներկայացնել, ապա ավելացրեց, որ եթե դատարանը բավարար է համարում սահամանահատումը կազմակերպելու համար կողմի ներկայացրած հիմքերը, ապա թույլտվությունը կարող է տալ առանց դատական նիստի` հաշվի առնելով հարցի հրատապությունը։

«Դրա նպատակով դատարանը հարկ չի համարում առանձին նիստ հրավիրել, դրա նպատակահարմարությունը չի տեսնում»,- ասաց Դանիբեկյանը։
Ինչ վերաբերում է նախորդ նիստի ընթացքում գործի նյութերի սխալ թարգմանությանը, ապա ընկերության կողմից այսօրվա նիստից առաջ պարզաբանում է ստացվել, համաձայն որի՝ տեխնիկական բնույթի վրիպում է եղել և տեքստի վերջնական մշակված տարբերակի փոխարեն շփոթմամբ տպվել ու դատարան է ուղարկվել թարգմանված տեքստի նախնական, դեռևս չմշակված տարբերակը։

Ամբաստանյալի բացակայությամբ՝ դատական նիստը չէր կարող շարունակվել, ըստ այդմ, այն հետաձգվեց՝ մինչև դեկտեմբերի 13–ն, ժամը 13։00–ն։ Մինչ դատական նիստը կհետաձգվեր՝ Արմեն Գևորգյանի պաշտպան Լուսինե Սահակյանը հայտնեց, որ միջնորդություն է ներկայացվել Արմեն Գևորգյանին՝ դեկտեմբերի 13-16 երկրից բացակայելու թույլտվության վերաբերյալ, որը, սակայն քննության առարկա չդարձվեց այս նիստին, քանի որ դատավորը չէր ծանոթացել միջնորդությանը։ Մեղադրող դատախազ Գևորգ Բաղդասարյանն առարկել էր՝ ամբաստանյալի բացակայությամբ միջնորդության քննության դիրքորոշման դեմ։ Դատարանը որոշեց՝ հետաձգել նիստը և ծանոթանալ միջնորդությանը, որոշման մասին կտեղեկացվի կողմերին։ Գևորգ Բաղդասարյանն էլ պնդեց՝ վարութային հարցերը պետք է քննարկվեն դատական նիստերի դահլիճում։

Ըստ մեղադրական եզրակացության՝ Ռոբերտ Քոչարյանը մեղադրվում է այն բանի համար, որ նա, 1998-2008թ զբաղեցնելով ՀՀ նախագահի պաշտոնը, իր պաշտոնեական դիրքն օգտագործելով Սիլվա Համբարձումյանի օգտին գործողություններ կատարելու, նպաստելու, այն է՝ ընկերությանը տրամադրված ընդերքն օգտակար հանածոների շահագործման համար հատուկ լիցենզիաներով ընկերության 100 տոկոս բաժնեմասերի ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար 2008թ փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով 927 մլն ՀՀ դրամին համարժեք 3 մլն ԱՄՆ դոլարի չափով կաշառք։ Ըստ մեղադրական եզրակացության՝ Արմեն Գևորգյանը մեղադրվում է այն բանի համար, որ նա, 2006թ փետրվարից մինչև 2008թ ապրիլի 21-ը զբաղեցնելով ՀՀ նախագահի աշխատակազմի ղեկավարի և ԱԽ քարտուղարի պաշտոնները, օգտագործելով իր պաշտոնեական դիրքը, Սիլվա Համբարձումյանի օգտին գործողություններ կատարելուն նպաստելու համար 2008թ ապրիլին Սամվել Մայրապետյանի օժանդակությամբ ստացել է 309 մլն ՀՀ դրամին համարժեք 1 մլն ԱՄՆ դոլար կաշառք, ինչպես նաև՝ խեղաթյուրելով և թաքցնելով նման գումարի իրական բնույթն ու ծագումը, օրինականացրել է առանձնապես խոշոր չափերով հանցավոր ճանապարհով ստացված եկամուտները։

Հեղինակ՝ Իզաբել Սահակյան

Աղբյուր` Փաստինֆո