Փաստ ինֆո

«Օրենքով գող» Պզոյի՝ Արմեն Ղազարյանի, մոտ հայտնաբերված փոշենման զանգվածը ոչ թե թմրանյութ էր, այլ՝ ցեմենտի կտոր։ Այս մասին «Փաստինֆո»-ի հետ զրույցում ասաց փաստաբան Արմեն Մելքոնյանը։

Հիշեցնենք, որ «Պզո» մականունով հայտնի Արմեն Ղազարյանը և մի քանի տասնյակ անձինք, այդ թվում՝ «Կաբելի տղա» մականունով անձը, որը պետք է կարգվեր որպես «օրենքով գող», նոյեմբերի 1-ին Երևանում՝ Մուրացան 109 հասցեից բերման էին ենթարկվել՝ ապօրինի զենք, զինամթերք կրելու, թմրանյութ կրելու կասկածանքով։ Ոստիկանությունից հայտնել էին, որ նշված հասցեում հայտնաբերվել էր «Մակարով» ատրճանակ՝ լիցքավորված 9 մմ տրամաչափի 7 փամփուշտով, «ՏՕԶ» տեսակի հրացանի փամփուշտ, շագանակագույն փոշենման զանգված՝ 144 գրամից ավելի քաշով և այլն:

Քրեական վարույթի շրջանակներում ձերբակալվել, ապա կալանավորվել էր Արմեն Ղազարյանը՝ «Պզոն», որը, ինչպես պարզվեց, տևական ժամանակ գտնվել է քաղաքացիական հիվանդանոցում։ Վերաքննիչ քրեական դատարանն էլ օրերս վերացրել էր Արմեն Ղազարյանի նկատմամբ ընտրված խափանման միջոց կալանավորումը՝ բեկանելով առաջին ատյանի դատարանի որոշումը։

Փաստաբան Արմեն Մելքոնյանը «Փաստինֆո»-ի հետ զրույցում հայտնեց, որ Ղազարյանի նկատմամբ այս պահին խափանման միջոց ընտրված չէ։

Անդրադառնալով Ղազարյանի՝ հիվանդանոցում գտնվելու հանգամանքին՝ փաստաբանը նշեց, որ ամբողջ ընթացքում չէր հիվանդանոցում, մի պահ վատացել էր՝ տեղափոխել են հիվանդանոցում։

«ԱՄՆ-ում նրա սիրտը բաց վիրահատության էր ենթարկվել։ Մինչև ձերբակալությունը՝ մոտ 10 օր հիվանդանոցում պառկած էր՝ կրկին սրտի համար։ Երբ որոշումը եղավ, ինքը ՔԿՀ-ում էր, հիմա էլ՝ պառկած է, դուրս չի գրվել»,- ասաց փաստաբանը։

Ինչ վերաբերում է մեղադրանքին, ապա Մելքոնյանն այն «անհիմն» և «մտացածին» որակեց։ Ավելին, խուզարկությամբ հայտնաբերված փոշենման զանգվածը, որն իրավապահների պնդմամբ, թմրանյութ էր, ըստ պաշտպանի, իրականում եղել է ցեմենտ։

«Իր մոտից խուզարկությամբ ոչինչ չի հայտնաբերվել։ Այդ տարածքից հայտնաբերվել է ցեմենտի կտոր, որը ներկայացվել է որպես հերոին՝ մինչև փորձագետների հայտնելը, որ դա ցեմենտ է։ Այսինքն՝ ես գտնվեմ սրճարանում, այդտեղ ինչ-որ բան հայտնաբերվի, վերագրեն ինձ, այն էլ՝ ցեմենտի կտոր՝ինչպես պարզվեց վերջում։ Արմեն Ղազարյանն ուր, թմրամիջոցներն ուր»,- ասաց Մելքոնյանը։

Հեղինակ՝ Իզաբել Սահակյան

Աղբյուր` Փաստինֆո