Փաստ ինֆո

Հայաստանի ներկայիս իշխանությունները երբեք չեն հակադրվելու թուրքական կամ Ադրբեջանական դիրքորոշումներին՝ իբր խաղաղության օրակարգը չվտանգելու պատրվակով և Հայաստանից պաշտոնական արձագանքը, կամ դրա բացակայությունը տրամաբանական էր՝ հենց այդպես էլ պետք է լիներ, քանի որ 2018 թվականից սկսած նրանք իրականացնում են Արցախից հրաժարվելու քաղաքականությունը։ «Փաստինֆո»-ի եթերում ասել է քաղտեխնոլոգ Արմեն Բադալյանը՝ անդրադառնալով շաբաթ օրը մի խումբ ադրբեջանցիների կողմից Արցախը Հայաստանին կապող կյանքի ճանապարհը փակելուն։

Նման քայլով, ըստ մեր զրուցակցի, Ադրբեջանը փորձում էր երկու խնդիր լուծել՝ նախ վերահսկողություն սահմանել Արցախի տնտեսական կարևորագույն ենթակառուցվածքների վրա, հետո, ստուգելով ռուս խաղաղապահների արձագանքը, փորձել վերահսկողություն սահմանել Արցախ-Հայաստան ճանապարհի վրա։ Ու թեև ադրբեջանական այս սադրանքը համընկավ ՀՀ ԱԺ-ում հակաադրբեջանական հայտարարությունը տապալելու փաստի հետ, բայց դա Արմեն Բադալյանն, ավելի շուտ, զուգադիպությանն է վերագրում։

Կան տեակետներ, համաձայն որոնց, եթե միևնույն է՝ իշխանությունները տապալելու են հակաադրբեջանական կամ հակաթուրքական որևէ դրսևորում, ապա ընդդիմության կողմից նման խնդիրների բարձրաձայնումը կամ նախաձեռնությունները վնասում են Հայաստանի արտաքին իմիջին. Այս կապակցությամբ Արմեն Բադալյանը «Փաստինֆոյին» ասաց, որ Հայաստանի վարկանիշը առանց այն էլ այնքան ցածր է, որ մինուս 1000-ից եթե դառնա մինուս 1005 կամ մինուս 950՝ որևէ եական բան դրանից չի փոխվի։ Իսկ իմանալու համար, թե ինչ պետք է անել, ընդդիմությունն ինքը պետք է որոշի ու հասկանա, թե ինչ է ուզում։

Անդրադառնալով քաղաքական ուժերի ներսում դիտարկվող տեղաշարժերին՝ Արմեն Բադալյանը վստահեցնում է՝ ընդդիմադիր ուժերն իրենց հնարավորությունների 100 տոկոսի չափով չեն աշխատում, իսկ երբ ամբողջ ուժով չեն աշխատում, ուժի ներսում խնդիրներ են առաջանում։ Քաղաքական ուժն էլ նման է մեքենայի,- ընդգծեց քաղտեխնոլոգը, եթե երկար ժամանակ նորմալ չի աշխատում՝ հիվանդանում կամ փչանում է։ Իսկ փչացած քաղաքական համակարգից որևէ լուրջ ակնկալիք չի կարելի ունենալ։

Մանրամասները՝ տեսանյութում։

Աղբյուր` Փաստինֆո