Փաստ ինֆո

Այս պահի դրությամբ ավելի շատ հավանական եմ համարում ռազմական բախումները Հայաստանի կամ Ադրբեջանի միջև, քան որևէ ձևաչափով հանդիպումները:Դրանք կարող են լինել լոկալ բնույթի կամ ավելի մեծ մասշտաբի, բայց ադրբեջանական կողմից հնչող սպառնալից հայտարարությունները, գրեթե ամեն օր հրադադարի խախտման մասին ապատեղեկատվությունները կամ հայերին պատժելու վերաբերյալ հայտարարոությունները վկայում են, որ Ադրբեջանը պատրաստ չէ բանակցությունների: «Փաստինֆո»-ի հետ զրույցում նման հայտարարություն է արել ադրբեջանագետ Գառնիկ

Դավթյանը՝մեկնաբանելով Ադրբեջանի արտգործնախարարի հայտարարությունը, թե «հնարավոր է Հայաստանի հետ բանակցությունների 3-րդ ռաունդ անցկացվի մինչեւ տարեվերջ»։

Փորձագետն արձանագրում է , որ այս պահին բանակցայի գործընթացը Հայաստանի և Ադրբեջանի միջև գրեթե փակուղի է մտել, ադրբեջանական կողմը հրաժարվում է անգամ հանդիպումներից, փոխարենը՝ ուժի կիրառման միջոցով է փորձում հասնել իր նպատակներին:

Ընդ որում՝ փորձագետը շեշտում է, որ ադրբեջանական կողմը միտումնավոր է բանակցային գործընթացը փակուղի տանում, որպեսզի ռազմական գործողությունների դիմի.

«Նրանք կփորձեն հայկական կողմին ներկայացնել որպես ոչ կառուցողական կողմ և տարբեր հայտարարություններով՝ թե հայերը Լաչինի միջանցքով զենք են տեղափոխում, կամ կրակում են սահմանին, չեն ուզում համագործակցել դիվանագիտական հարթակում, կստանան այնպիսի մթնոլորտ, որ ռազմական գործողություններով պարտադրեն ՀՀ իշխանություններին, որ նոր փաստաթուղթ ստորագրեն:

Փաշինյանն էլ քանի որ վախկոտ ղեկավար է, հեշտ կհամաձայնվի ամեն ինչին, կարող է մի տասը օրից լուրջ լարումներ լինեն սահմանին, ինքն էլ վախենա և որոշի ստորագրել պայմանագիրը: Այս իշխանությունները անսկզբունքային են, յուրաքանչյուր «հաթաթայից» հետո համաձայնվում են թշնամու կողմից պարտադրվող պահանջներին, բայց համարժեք գործողության չեն դիմում»,-ասաց ադրբեջանագետը:

Ինչ վերաբերում է շաբաթ օրը տեղի ունեցած միջադեպին, երբ ադրբեջանցիները կեղծ պատճառաբանություններով շուրջ 3 ժամ փակ էին պահել Լաչինի միջանցքը՝ փորձագետը կարծում է, որ սրա հիմնական նպատակը Լաչինի միջանցքի հատվածում անցակետ ունենալն է, որպեսզի դրա միջոցով «վերահսկեն» բնակիչների անցուդարձը.

«Իսկ եթե Լաչինում անցակետ դնեն, ապա Ադրբեջանը, առնվազն անձնագիրը ստուգելով, կարող է հեշտությամբ տարբեր տեղեկություններ հավաքել Արցախի մեր հայրենակիցների մասին և հետագայում օգտագործել դրանք»,-ասաց Գառնիկ Դավթյանը՝ չբացառելով, որ Լաչինի միջանցքը փակելու այս դեպքը շարունակական բնույթ կրի.

«Ուղղակի այս դեպքում նրանք նոր հնարամտության կգնան և տարատեսակ անհեթեթ պատճառաբանություններ կբերեն՝ ճանապարհը փակելու համար »,-հավելեց ադրբեջանագետը:

Աղբյուր` Փաստինֆո