Փաստ ինֆո

Այդ երեխային՝ Շուշան Փաշինյանին, ես չեմ թիրախավորել, նրան թիրապավորում են նրա ծնողները։ Այս մասին դատական նիստի ընթացքում հայտարարեց Նարեկ Սամսոնյանը։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Լիզա Գրիգորյանի նախագահությամբ, այսօր կայացել է «Իկրայի գործով» դատական նիստը։

Հայցվորը՝ ՀՀ վարչապետ Նիկոլ Փաշինյանի դուստր Շուշան Փաշինյանը, պահանջում է պարտավորեցնել «Քաղաքացիական գիտակցություն» ՀԿ նախագահ, «Antifake» լրատվական կայքի հիմնադիր Նարեկ Սամսոնյանին՝ հրապարակայնորեն հերքել զրպարտություն հանդիսացող տվյալները։

Մասնավորապես, Նարեկ Սամսոնյանը ֆեյսբուքյան գրառում էր կատարել՝ նշելով, որ Նիկոլ Փաշինյանի ընտանիքն ամեն ամիս ռեստորաններից մեկից գնում է 3000 դոլար արժողությամբ սև խավիար, որովհետև նրա միջնեկ դուստրը՝ Շուշան Փաշինյանը, սև խավիար շատ է սիրում: Հետո, ըստ գրառման, երբ նորից են ուզել խավիար գնել, փորձել են անկանխիկ վճարել, բայց նրանց հայտնել են` այդ դեպքում այն ավելի թանկ է արժենալու։ Դրանից հետո Փաշինյանը ՊԵԿ-ին հրահանգել է զբաղվել այդ ռեստորանով, իսկ Նիկոլ Փաշինյանի անչափահաս դուստրը դատի էր տվել Նարեկ Սամսոնյանին: Այժմ նշված հայտարարության առնչությամբ երկու դատավարություն է ընթանում. հարուցված քրեական գործը գտնվում է դատաքննության փուլում՝ դատավոր Արտուշ Գաբրիելյանի վարույթում, իսկ Շուշան Փաշինյանի հայցադիմումն ընդդեմ Նարեկ Սամսոնյանի՝ դատավոր Լիզա Գրիգորյանի վարույթում։ Ընդ որում, Շուշան Փաշինյանի հայցադիմումը դատարանը քննում է երկրորդ անգամ. դեռևս 2021թ հունիսի 18-ին դատավոր Զարուհի Նախշքարյանը մերժել էր հայցադիմումը, ինչից հետո դատավորի նկատմամբ կարգավապահակն վարույթ էր հարուցվել՝ նշված գործով ինքնաբացարկ չհայտնելու համար, իսկ Վերաքննիչ քաղաքացիական դատարանը որոշել էր բեկանել առաջին ատյանի դատարանի վճիռը՝ գործն ուղարկելով նոր քննության և, ըստ այդմ, գործն այժմ երկրորդ անգամ է քննվում ՝ դատավոր Լիզա Գրիգորյանի նախագահությամբ։

Այսօր կայացած դատական նիստի ընթացքում հայցվորի ներկայացուցիչ, փաստաբան Վանիկ Մարգարյանը նշեց՝ Նարեկ Սամսոնյանը թիրախավորել է իր վստահորդին, բացասական ընկալում ձևավորել Շուշան Փաշինյանի նկատմամբ, ինչին արձագանքելով Սամոսնյանը նշեց, թե զարմանում է՝ ինչպես կարող է իկրա ուտելը բացասական ընկալում ձևավորել. «Այսինքն՝ Դուք պնդում եք, որ 2000 դոլարով 2 կգ իկրա ուտելը շատակերության նշա՞ն է»։ Պատասխանող կողմի ներկայացուցիչ Ծովինար Կարապետյանն էլ արձանագրեց՝ առհասարակ այս դեպքում զրպարտության դեպք առկա չէ, քանի որ ՄԻԵԴ նախադեպային իրավունքով՝ ԶԼՄ-ների ներկայացուցիչների հրապարակումները նպաստում են հանրային քննարկմանը։ Պատասխանող կողմի պնդմամբ՝ Նարեկ Սամսոնյանի քննադատության թիրախը երկրի ղեկավարի աղջիկը չի եղել, այլ՝ հենց Նիկոլ Փաշինյանը, միևնույն ժամանակ, Սամսոնյանն արձանագրեց, որ այդ տեղեկությունն իրեն հայտնել են որպես ԶԼՄ ներկայացուցչի, հետևաբար աղբյուր բացահայտել չի կարող։

«Այս անչափահաս երեխան իր հոր ու մոր կողմից թիրախավորվել է ու դարձել գործ տվող, հայցվոր: Երեխային թիրախավորել են իր ծնողները: Իմ թիրախը երեխան չէ, այլ սուտ խոսող քաղաքական գործիչը: Ես ամաչում եմ, որ անչափահաս երեխայի հետ կապված եմ այստեղ»,- ասաց Նարեկ Սամսոնյանը՝ հավելելով, որ երեխային թիրախավորել են հենց նրա անունից հայցադիմում ներկայացնելով։ Պատասխանողի պնդմամբ՝ քննադատություն եղել է, դա բացասական երանգ է ունեցել, սակայն դա ուղղված է եղել քաղաքական պաշտոն զբաղեցնող անձին, այլ ոչ թե՝ նրա անչափահաս երեխային։

Դատական նիստը հետաձգվեց՝ մինչև դեկտեմբերի 28-ը՝ ժամը 14:00-ն:

Հեղինակ՝ Իզաբել Սահակյան

Աղբյուր` Փաստինֆո