Փաստ ինֆո

Հայաստանից դեպի Ռուսաստանի Դաշնություն ուղևորվող բեռնատարների հերթը,կարելի է ասել, սկսվում է հայ-վրացական սահմանից և ձգվում մինչև ռուս-վրացական սահման՝ «Վերին Լարս»։ «Սպայկա» ընկերության նախագծերի կառավարման բաժնի ղեկավար Կարեն Բաղդասրյանը «Փաստինֆո»-ին փոխանցեց, որ տեղեկություն էին ստացել, թե սահմանային հսկողության մի քանի կետեր են ավելացրել, բայց դրանից իրավիճակը որևէ դրական փոփոխություն չի կրել՝ շարունակում է մնալ շատ վատ վիճակում։

Վերին Լարսում արդեն մոտ երկու ամիս է՝ կիլոմետրանոց հերթեր են, ըստ պաշտոնական պարզաբանման՝ Ղրիմի կամրջի պայթյունի կապակցությամբ Ռուսաստանի Դաշնության կողմից ձեռնարկված անվտանգային նոր միջոցառումների և վերահսկողության խստացման կապակցությամբ։ Խնդիրն այն է, որ Ղրիմի կամրջի պայթյունից հետո ռուսական կողմը սկսել է առավել մանրակրկիտ ստուգել հատկապես այս մաքսակետով ՌԴ մուտք գործող բեռնատարները, ինչը զգալիորեն՝ անգամներով դանդաղեցրել է մաքսակետն անցնելու պրոցեսը։ Արդյունքում Հայաստանից ՌԴ տարածք և հակառակ ուղղությամբ փոխադրումներ իրականացնող հազարավոր բեռնատարներ՝ իերնց վարորդներով, հազարավոր տոննաներով ապրանք, միլիոնավոր գումարներ մնացել են Վրաստան-Ռուսաստան ճանապարհներին՝ բախտի քմահաճույքին։

«Մեքենաները գնում-կանգնում են մի 20-30 օր, մինչև անցնեն ռուսական կողմ։ Ռուսական կողմում արդեն ամեն ինչ շատ արագ է տեղի ունենում։ Մեր սահմանից մինչև «վերին Լարս» հերթեր են։ Կոնկրետ թիվ չեմ կարող ասել, բայց կարող եմ վստահեցնել, որ 1500-ից ավել մեքենա կա՝ միայն էստեղից գնացողները, որ հերթերի մեջ են։ Ռուսաստանից եկողներն էլ են հերթերի մեջ»,- «Փաստինֆո»-ին տեղեկացրեց Կարեն Բաղդասարյանը։
Նա հայտնեց, որ այս ամբողջ ընթացքում միայն «Սպայկա» ընկերությունը, տարբեր հաշվարկներով, մոտ 4-5 միլիոն դոլարի վնաս է կրել։ Բոլորն էլ մեծ վնասներ են կրել և շարունակում են կրել, նշեց մեր զրուցակիցը։

«Ամեն օր բեռ ենք ուտիլիզացնում։ Մեքենայի մեջ է ապրանքը՝ մենք չգիտեենք՝ տեղ հասնելուց հետո պատվիրատուները կընդունե՞ն այն, թե՞ ոչ։ Որովհետև հաճախ խանութները չեն ընդունում մեր բեռները։ Ամեն օր մենք ոչ թե բեռ ենք արտահանում, այլ արտահանված ու փչացածն ենք թափում»,- իրավիճակը ներկայացրեց Կարեն Բաղդասարյանը։

Նրա դիտարկմամբ՝ արդեն ձմեռ է, և եղանակային պայմաններն էլ ամեն վայրկյան կարող են տհաճ անակնկալներ մատուցել։ Ու եթե, օրինակ, ձնաբուք լինի «Վերին Լարսում», ապա մեքենաների հոսքը կդադարեցվի։ Այդ դեպքում ընկերությունների կրած վնասներն ավելի կշատանան։

Աղբյուր` Փաստինֆո