Փաստ ինֆո

Եթե մենք պայմանավորվածություն ունենք, որ կարգավիճակի մասին խոսակցությունները պետք է թողնել ապագա սերունդներին, ենթադրվում է, որ այս պահի դրությամբ դրա մասին խոսելը առնվազն մեր փոխադարձ պայմանավորվածություններից դուրս է: Այս մասին լրագրողների հետ զրույցում ասել է ՔՊ խմբակցության պատգամավոր, ԱԺ արտաքին հարաբերությունների հանձնաժողովի նախագահ Էդուարդ Աղաջանյանը։

ՌԴ ԱԳ նախարար Լավրովի երեկ հայտարարել էր, թե Ռուսաստանն առաջարկել է Լեռնային Ղարաբաղի կարգավիճակի հարցը թողնել հետագա քննարկման, բայց Հայաստանի և Ադրբեջանի ղեկավարները Սոչի գնացել էին Պրահայի հանդիպման ժամանակ ընդունված փաստաթղթերով։

Էդուարդ Աղաջանյանը, անդրադառնալով այս հայտարարություններին, ասաց․ «Բանակցությունների ընթացքը և դրանց մանրամասները հրապարակվել են։ Այսինքն՝ ոչ Սերգեյ Լավրովն է որևէ նոր բան ասել, ոչ ես կարող եմ ավելացնել։ Ես կարծում եմ՝ Հայաստանի կողմից Ալմաթիի հռչակագրին հղում տալով՝ որևէ հնարավորություն չի կորսվել, դրա արդյունքում չի նշանակում, որ տևական ժամանակ անց հնարավորություն չի լինի կարգավիճակին անդրադառնալ։

Իրականում ԼՂ կարգավիճակի հարցը հետագային թողնելու առաջարկը եղել է Ռուսաստանի կողմից, դրան հայկական կողմը համաձայնել է։ Ենթադրվում է, որ դրա հնարավորությունների և անհնարինության գնահատումը, այո, պետք է Ռուսաստանի կողմից հնչի՝ պայմանավորված նրանով, թե Ռուսաստանը որպես միջնորդ ինչքանով է կարողանում այդ առաջարկներն իրողություն դարձնել։ Այդ հարցը ոչ մի կերպ կապված չէ Ալմաթիի փաստաթղթի հետ, միայն ու միայն կապված է նրա հետ, թե ստեղծված իրավիճակում ինչքանո՞վ մեր Ռուսաստանի գործընկերները կարող են այդ առաջարկն իրողություն դարձնել»:

Աղբյուր` Փաստինֆո