Փաստ ինֆո

Ֆրանսիայի օրենսդրի երկու պալատների կողմից կարևոր նախագծի ընդունումից հետո Հայաստանի խորհրդարանի դեմքը ի ցույց դնելն ուղղակի ամոթ էր: Եթե սա ընդդիմությունն արել է չհասկանալով, ապա մենք հերթական անգամ գործ ունենք քաղաքականության հետ որևէ աղերս չունեցող խորհրդարանի հետ: Այսպես «պադստավկա անել սեփական երկիրը», ես չեմ պատկերացնում: Դա նույն բանն է, որ պահանջես՝ Ալիևը ընդունի նախագիծ, որտեղ Արցախը պետք է ճանաչվի Հայաստանի մաս, եթե գիտեմ, որ Ալիևը չի ընդունելու, ես իրեն երբեք քննարկման չեմ հրավիրի: «Փաստինֆո»-ի հետ զրույցում այսպես է մեկնաբանել ԱԺ նախկին պատգամավոր Նաիրա Զոհրաբյանը՝ Հայաստանի խորհրդարանի կոզմից Ադրբեջանի ագրեսիան դատապարտող հայտարարությունը չընդունելը:

Նշենք, որ այսօր ՀՀ ազգային ժողովը արտահերթ նիստով քննարկել է ընդդիմադիր «Հայաստան» խմբակցության հեղինակած ՀՀ ԱԺ հայտարարության նախագիծը՝ Ադրբեջանի խորհրդարանի 2022 թվականի նոյեմբերի 8-ի հայտարարության կապակցությամբ: Իշխող «Քաղաքացիական պայմանագիր» խմբակցությունը չմասնակցեց քվեարկությանը, ինչի պատճառով հայտարարության նախագիծը չընդունվեց:

Ինչպես ընդդիմադիրներն են մեկնաբանում՝ ՔՊ-նառաջարկել է նախագծից հանել Արցախի Հանրապետություն բառակապակցությունն ու գրել Ղարաբաղի հայություն, ինչպես նաև ինքնորոշման իրավունքը վերաբերյալ դրույթը :

Ստացվում է՝ Հայաստանի իշխանությանը և ընդդիմությանը չի հաջողվում մի կողմ դնել քաղաքական ամբիցիաները և ընդհանուր հայտարարի գալ գոնե Հայաստանի և Արցախի շահերից բխող հարցերում:

ԱԺ նախկին պատգամավոր Նաիրա Զոհրաբյանը կարծում է, որ ընդդիմության հերթական սխալն էր՝ նախաձեռնել նման օրակարգով արտահերթ նիստ՝ հստակ իմանալով, որ իշխանությունը չի ընդունելու հայտարարության նախագիծ, որտեղ նշված է, որ Արցախը երբեք չի լինելու Ադրբեջանի կազմում.

« Եթե իրենց նպատակն էր ցույց տալ, որ մենք գործ ունենք ազգադավ իշխանության հետ, դա բացարձակ օրակարգ չէ, քանի որ Հայաստանում չկա որևէ մեկը, այդ թվում՝ նիկոլական սեկտան, որը չգիտի, որ Հայաստանի իշխանությունը սպասարկում է թուրք-ադրբեջանական շահերը: Միայն սրա համար նիստ հրավիրել՝ նշանակում է «պադստավկա» անել Հայաստանին և Արցախին, սա ոչ ճշգրիտ հաշվարկ էր, ամոթ է: Այն ինչ արեց իշխանությունն այսօր, չմիանալով հայտարարությանը, նշանակում է հերթական անգամ վաճառել ՀՀ-ն և Արցախը, բայց հերթական անգամ սա ի ցույց դնելը միջազգային հանրությանը, այստեղ քաղաքական լոգիկա չեմ տեսնում»,-ասաց Զոհրաբյանը:

Զրուցակիցը կարծում է՝ այսօրվա ԱԺ նիստը էականորեն թուլացրեց միջազգային հարթակում Հայաստանի դիրքերը: Նրա խոսքով՝ եթե անգամ Հայատանի խորհրդարանն Ադրբեջանի ագրեսիան դատապարտող հայտարարություն չի ընդունում, ուրեմն ոչինչ էլ չի կարող միջազգային հանրությունից պահանջել.

«Առաջիկա օրերին ես պետք է մեկնեմ Եվրոպա, և չգիտեմ՝ այս տապալված նիստից հետո ի՞նչ արգումենտներով եմ խոսելու, չէր կարելի նախաձեռնել նման նիստ ընդամենը ցույց տալու, որ մենք ունենք ազգադավ իշխանություն:

Ես խոսելու եմ այնտեղ Արցախի կարգավիճակի մասին, շուռ են գալու ինձ ասեն՝ քո երկրի խորհրդարանը հրաժարվել է դատապարտել Ադրբեջանի ագրեսիան, այն դեպքում, երբ ԵՄ բազմաթիվ երկրներ են դատապարտում, եթե անգամ դուք չեք ընդունում հայտարարություն, մենք ինչո՞ւ ձեզանից հայ լինել: Մենք ուզում ենք լինել թուրք, բայց եվրոպական երկրներից պահանջում ենք լինել հայ»,-հավելեց Զոհրաբյանը:

Աղբյուր` Փաստինֆո